Гюльнара Мягьямедова
23-пи апрели Мягьячгъалайиъ «Марва-тур» гьяж-компанияйин кIулиъ айи Булат Къурбанов республикайин СМИ-йин вакиларихъди гюрюшмиш гъахьну. Дугъу журналистариз гьаму йисан гьяждиз гъягърударин ляхин тешкил апIбакан ктибтнийи.
«2024-пи йисан Дагъустандиан Саудовский Аравияйиз гьяждиз гъягърудариз 10 агъзурна 70 йишв тувна. Думу йишвар, улихьна йисариси дарди, гьяждиз гъягърудар рякъюъ тIаайиз саб вазна гьацI ккимиди визйирра гъадагъну, гьязурди а.
Гьяждиз гъягърудар айи сабпи самолет 29-пи майди Мягьячгъалайиан удубчIвиди. Гьяждиз гъушу вари 10 агъзуртIан артухъ касар 20-пи июндихъан хъюгъну 2-пи июлизкьан кьяляхъ гъювал планламиш дапIна.
Урусатдиин санкцйир илитIна-йивалихъди аьлакьалу вуди, гьяждиз гъягърудар гъахуз Кувейт гьюкуматдин авиакомпанйирихъди йикьрар йитIна.
Дагъустандиъ гьяждиз гъягърудар тIирхбан кьюб программа а: сабпиб, Мягьячгъалайиан диш Саудовский Аравияйиз тIирхуб; кьюбпиб, Мягьячгъалайиан Дубайин аэропортдиз самолетдиъди дитIирхну, хъа дилинтина Мединайиз ва Меккайиз автобусариъди гъягъруб. Самолетдин кьяляхъ автобусдиъди гъягъру рейснан кьимат 4790 доллар, хъа диш Меккайиз ва Мединайиз самолетдиъди гъягъру рейснан кьимат 5490 доллар ву.
2023-2024-пи йисарин арайиъ «Марва-тур» компанияйи, Умра-гьяждиз гъушдарра кади, гирами ругариина 30 агъзуриинакьан агьалйир гьаъну», – къайд гъапIнийи Булат Къурбановди.
«Марва-тур» компанияйин кIулиъ айири гьаму йисан гьяждиз гъягъбан кьиматар за хьуваликан ва жара дигиш’валарикан ктибтнийи.
«Эгер гьяждиз гьягъюз виза гъадабгъу касдихьан, аьзарлу духьну, ясана жара себеб ади, гьяждиз гъягъюз дархьиш, Саудовский Аравияйи пулин дакьатар кьяляхъ туврадар. Гьяждиз гъягъюз ният ади, хъа чахьан гъягъюз дархьи касдиз гизаф кьадар пулин зарар шула.
Гьяждиз гъушу инсанар ерлешмиш апIру чадрар дивнайи Мина кIуру йи-шваъра дигиш’валар духьна. Меккайин гъирагъдиъ айи аьхю аьтрафариин вари дюн’яйин уьлкйириан гьяждиз дуфнайи 3 миллионкьан инсанар ерлешмиш апIуру. Душваъ чадрариъ яшамиш шулайи инсанари кми-кмиди манишин аьгь апIуз гъагъиди вуйиваликан аьрзйир апIури шуйи. Гьаму йисан Саудовский Аравияйи чадрар, хал жюрейиинди албагну ва кондиционерар дивну, кьайдайиз дубхнайиваликан мялуматар тувнийи ва гьяждин кьиматар за духьнайивал гьаддихъди аьлакьалу гъапIнийи.
Хъа мидланра савайи, гъубшу йисанси дарди, гьаму йисан Урусатдиъ долларин кьиматра за гъабхьну. Гьяждиз гъягъбан кьимат гьаддиканра асиллу шула.
Гьаму йисан 23-пи майдихъан 10-пи июндизкьан, гьяждиз гъягъру вахтнан арайиъ, гьяждин виза хьадру харижи уьлкейин агьалийиз Меккайин жилариин хьуз ихтияр адар», – гъапнийи Булат Къурбановди.
Дугъу гьацира «Марва-тур» ООО-йин республикайиан гьяждиз гъягъру агьалйириз 21-22 йигъкан ибарат вуйи варитIан жикъи программа вуйиваликан гъапнийи. Жара уьлкйириан гьяждиз гъягъюрайидарин программйир 60 йигъанкьан давам шула.
Гирами ругариина гъягъюрайидариз ягъурлу рякъ ккун апIурахьа.
