Наргиз Гюлечова
Октябрин 8-диан 11-дизкьан Москвайиъ айи «Тимирязев Центриъ» гъулан мяишатдин сурсатарин «Гъизилин ччвул» ччвур тувнайи Урусатдин XXVII выставка кIули гъубшну. Гьарганси ццира думу выставкайиъ Дагъустандиан, республикайин Правительствойин председателин заместитель Нариман АьбдулмутIалибов ва региондин гъулан мяишатдин ва ипIру-убхъру сурсатарин министрин вазифйир вахтназди тамам апIурайи Зураб Куччаев кIулиъ ади, аьхю делегация иштирак гъабхьну.
Выставкайиз Дагъустандиан 30-тIан артухъ мяишатари чпи гьясил апIурайи сурсатар хьади гъушнийи. Гьадрарин арайиъ «Ириб» ООО, «Полоса» ООО, «Денеб» ОАО, «Дагфиш» ООО, «Кизлярагрокомплекс» АО, «Дербентский коньячный комбинат» АО ва хъанара хайлин жара карханйир айи.
Юкьуд йигъандин арайиъ кIули гъубшу выставкайиъ Урусатдин Правительствойин председатель Михаил Мишустин, дугъан заместитель Дмитрий Патрушев, РФ-йин гъулан мяишатдин министр Оксана Лут иштирак гъахьну. Выставкайин дахилнаъди гъулан мяишат артмиш хьпан, дидиъ алахьурайи читин месэлйир гьял апIбан ва му ляхнихьна жигьилар жалб апIбан рякъяр агбаз бахш дапIнайи заседанйир ва гергми столар гъухну. Гьадрарин арайиъ гьялал маркайин сурсатариз бахш дапIнайидарра айи.
Улихьна йисариси гьамусра Дагъустан Республикайиан выставкайиз духнайи сурсатарихъди ккабалгъну лап уткан стенд гьязур гъапIну. Стендиз лигуз ва духнайи сурсатарихъди таниш хьуз хайлин гьюрматлу касар гъафну. Гьадрарин арайиъди РФ-йин гъулан мяишатдин министрин заместитель Роман Некрасовра айи. Дугъу, республикайиъ гьясил дапIнайи сурсатарихъди таниш хьпан кьяляхъ Дагъустандин малдарвалинна балугъчивалин цирклар артмиш апIуз гизаф мумкинвалар айибдикан гъапнийи.
ИкибаштIан, Дагъустандин малдарвалин цирклиз артмиш хьуз фукьан вушра мумкинвалар а. Мисал вуди гъадабгъиш, гъийин йигъан ухьухь гьясил апIурайи чарвайин йикк варитIан ицциб тIяаьмнануб гьисаб апIура. Гьаддиз лигну, хайлин чарвайин сурсатар республикайиан экспортдизра гъягъюра. Хъа балугъарин сурсатарикан улхуруш, дурарин кьадарра мидиз улихьна йисаритIан 18% за дубхьна. Гьясиллувалра улихь гъябгъюз хъюбгъна.
Юкьуд йигъандин арайиъ кIули гъубшу гъулан мяишатдин сурсатарин «Гъизилин ччвул» кIуру XXVII выставкайин натижйир йивбиинди, Дагъустандин гъулан мяшатдин сурсатар гьясил апIурайи карханйир заан йишварин сагьибар хьбаз лигну, дурариз 15 гъизилин, 7 арсран ва 1 кемшрин медалар тувну.
Выставкайин дахилнаъди вуйи конкурсарин программайин жюрийи «Дербентский завод игристых вин» ОАО-йин сурсатариз 5 гъизилин ва 4 арсран медалар тувну. Мидланра савайи йимишар ва мейвйирин ширйир апIурайи «КМБ» ООО-йиз гъизилин 4, никкдикан вуйи сурсатар гьясил апIурайи «Амир-С» ООО-йиз гъизилин 3, «Дербент-Вино» ООО-йиз гъизилин 2, жинснан малар артмиш апIурайи «Курбан-сервис» ООО-йиз 1 гъизилин ва 2 арсран ва гьацира мейвйириканна йимишарикан консервйир апIурайи «ПОШ» ООО-йиз 1 арсран ва 1 кемшрин медалар тувну.
Дупну ккундуки, выставка гьязур дап1ну гъабхбак аьхю пай кивбаз лигну, Дагъустандин Правительствойизра диплом ва гран-при тувну. Мидихъди сабси, РФ-йин гъулан мяишатдин министерствойира чан терефнаан чухсагъулин кагъзар тувну. Ляхниъ ужудар хъуркьувалар улупбаз лигну, РД-йин ветеринарияйин Комитет, Дагмелиоводхоздин директор Мягьямед Юсупов, мелиорацияйин мониторинг гъабхбан центрин инженер Гьябибулла Аьлиханов РФ-йин гъулан мяишатдин министерствойихьан вуйи чухсагъулин кагъзарин сагьибар гъахьну.
