Наргиз Гулечова
7-пи октябри Мягьячгъалайиъ айи Дуствалин хулаъ Урусатдин кьялан пишекарвалин образованиейин 85 йисандин юбилей яркьуди къаршуламиш гъапIну.
Серенжемдиз республикайин ссузарин ллективарна студентар ва гьацира хайлин гьюрматлу хялар, гьадрарин арайиъди республикайин Халкьдин Собраниейин депутатар ва министерствйиринна ведомствйирин вакилар уч гъахьнийи. Юбилейихъди кьялан пишекарвалин образованиейин цирклиъ лихурайидар чан ва Дагъустандин Правительствойин председателин терефнаан тебрик апIури, РД-йин образованиейинна илимдин министр Ягь’я Бучаев
удучIвну гъулхнийи. Аьбдулмуслим Аьбдулмуслимовдихьан вуйи тебрикнан кагъзиъ къайд дапIнайиганси, экономикайин ва жямяаьтлугъ циркларин артмиш’валик кьялан пишекарвалин образованиейин вакилари, ужудар пишекрар гьязур апIури, аьхю пай кивра. Дидланра савайи, аьхиримжи йисари колледжарин материалинна техникайин бина йислан-йисаз мюгькам шула, цIийи устаханйир арццра, гьязур апIурайи пишекрарин кьадарра, ерира за шула.
Кайд дапIну ккундуки, гъийин йигъаз Дагъустандиъ 91 кьялан пишекарвалин образование туврайи тешкилатар а. Душваъра 41 агъзуртIан артухъ мялимар лихура ва экономикайин жюрбежюр цирклариз чарасуз лазим вуйи пишекрар гьязур апIура.
Халкьдин Собраниейин образованиейин комитетдин кIулиъ айи Елена Павлюченкойи чан улхбаъ республикайин кьялан пишекарвалин образование туврайи идарйирйирин хъуркьуваларикан гъапнийи, колледжари ва техникумари швнуб-саб региондинси, федералин дережайиъди кIули гъушу конкурсариъ гъалиб гъахьи пишекрар, гьадму гьисабнаъди сакьатвал кайидарра, адаурайивал къайд гъап1нийи.
Серенжемдиъ иштирак шулайи гьюрматлу хялари юбилейихъди аьлакьалу вуди ссузарин кIулиъ айидариз ва чпин ляхниъ тафавутлу гъахьи мялимариз жюрбежюр пешкешар тувнийи. Шадлугънан мярака аьхю концертдин программайиинди ккудубкIнийи.
Каспийск шагьрин С.Орджоникидзейин ччвурнахъ хъайи машинаринна сервисдин колледждин директорин заместитель Гюльсенем Мирзоевайи туву мялуматариинди, 100 йис тамам дубхьнайи му колледждиъ гьамусяаьт 1227 студентди аьгъювалар гъадагъура.
«Учухь очно жюрейииндиси, заочнора урхурайи студентар а. Кьялан пишекарвалин образование туврайи жара идарйириъси, учухьра студентари саки 3-йисантIан артухъ вахтна урхуру. Вушра, бязи пишйир бицIи вахтнан арайиъ агъю апIуз шлудар ву. Мисал вуди гъадабгъиш, туризмйин цирклиъ лихру пишекрар учухь 11 вазлин арайиъ гьязур апIура, хъа заводарин станокарихъ лихру пишекрар гьязур апIбаз сад йисна йицIисаб ваз лазим шула.
Ав, гъи республикайиъ агъзрариинди кьялан образование айи пишекрариъ игьтияж’вал. Саб терефнаан, пишекрар гьуркIри адар пузра шулдар, гьаз гъапиш колледжариъ, техникумариъ дурар тамамди ва гьуркIну гьязур апIура,
амма гьаз-вуш дицдар пишекрариз чпи аьгъювалар гъадагъу рякъюъди гъягъюз ккундар. Ич колледжди асас вуди заводарихъди ляхин апIура. Магьа гъи Каспийскдиъ швнуб-саб завод ляхник ка. С.Орджоникидзейин ччвурнахъ хъайи машинаринна сервисдин колледжиъ аьгъювалар гъадагъурайи рукьан устйири, харатчйири, наладчикари, машинар апIру технологари урхбан тажруба заводариъ гъабхура. ИкибаштIан, колледж ккудубкIбан кьяляхъ, дурарикан хайлиндар дина ляхнизра гъягъиди. Аммаки заводариъ туврайи маважиб гъийин йигъандин игьтияжариз гьубкIри адрувализ лигну, гьясил апIру йишвариъ дурар кьаназ гъузрадар. Ари гьадму ву гъи республикайиъ кьялан образование айи пишекрар гьуркIну адрувалин себеб», – гъапну колледждин директорин заместители.
Статистикайин улупбариинди, кьялан образование айи пишекрарикан гьамусяаьт республикайиъ варитIан гьуркIри адрудар гизафси зоотехникар, чIат йишвар марцц апIрудар, алверчивалин пишекрар, слесарарна сантехникар, сварка апIрудар, шир, гьякв йиврудар ву. Белки, маважиб ужуб тувуз хъюгъиш, му ляхин лазим вуйи къайдайиз гъюйхьиб…
