Гюльнара Мягьямедова

 

2020-пи йисхъанмина шагьрин мэрди лихурайи Рустамбег Пирмягьямедов жвуван хушниинди гъуллугънаан удучIвну. Дугъу сенатор Сулейман Керимовдиз, Госдумайин депутат Хизри Абакаровдиз ва Дагъустандин Глава Сергей Меликовдиз Дербент цIийи алапIбак пай кивуз чаз мумкинвал тувбаз чухсагъул мялум гъапIнийи. Рустамбег Пирмягьямедовди гьацира Аьгьмад Кьулиевдиз цIийи гъуллугънаъ сабурлувал ва хъуркьувалар ккун гъапIну.

 

Аьгьмад Аьбдусейнович Кьулиев (шиклиъ) 1960-пи йисан 1-пи июлиъ Ахцигь райондин Смугъулаъ бабкан гъахьну. СССР-ин МВД-йин Горькийин заан мектебдиъ юриспруденцияйиан пишекарвал гъадабгъну, цIиб вахтналан Дагъустандин гьюкуматдин технический университетдин экономикайин факультетра ккудубкIну.

Аьгьмад Кьулиев МВД-йин РД-йиъ айи тешкиллу дубхьнайи тахсиркарвалихъди женг гъабхру управлениейин начальникди, МВД-йин РД-йиъ айи экономикайин хатIасузвал уьбхбан ва коррупцияйиз аьксивал улупбан управлениейин начальникди, МВД-йин РД-йиъ экстремизмдиз аьксивал улупбан центрин начальникди, МВД-йин РД-йиъ айи полицияйин начальникдин заместителди ва жара гъуллугъариъ 40 йисантIан артухъ гъилихну.

Аьгьмад Кьулиев Кьягьялвалин ордендин, «Дирбаш’вализ» медалин, «Ватандин улихь лишанлу хьпаз» 2-пи дережайин ордендин, «Жямяаьтлугъ къайда уьбхбаъ лишанлу хьпаз» медалин, «Урусатдин МВД-йин гьюрматлу гъуллугъчи» лишнин, «Дагъустан Республикайин улихь лишанлу хьпаз» ордендин, «РФ-дин ОВД-йин лайикьлу гъуллугъчи» гьюрматнан ччвурнан, «РД-йин къанун уьбхру органарин лайикьлу гъуллугъчи», «РД-йин лайикьлу юрист» ва гьацдар жара наградйирин ва ччвурарин сагьиб ву.
Эвленмиш духьнайир ву, дугъаз кьюр байна сар риш а.