Зубайдат Шябанова
Гьаму йигъари Дагъустандин гьюкуматдин университетдин профессораринна аьлимарин десте Табасаран райондиз гъафну ва мектебарин заан классариъ урхурайидарихъди ва мялимарихъди гюрюшмиш гъахьну.
Серенжем Табасаран райондин Хючна гъулан 1-пи нумрайин лицейиъ кIули гъубшнийи.
ДГУ-йин социалинна тербияйин ляхнариз лигру проректор Мягьямед Хайирбегов кIулиъ ади, вуздин делегация-йин дахилнаъ социалин факультетдин декан Сайдархан Айгубов, химияйин факультетдин декан Мягьямед Бубуев, биологияйин факультетдин декан Рустам Халилов, физикайин факультетдин декан Вали Кьурбанисмяилов, математикайин факультетдин декан Амучи Якьубов ва жарадар айи.
Хялар ва уч духьнайидар тебрик апIури, Табасаран райондин кIулиъ айи Мягьямед Къурбановди къайд гъапIганси, гюрюшдин асас метлеб ДГУ-йин факультетарин аьлимарин коллективдин ва райондин мектебарин мялимарин арайиъ сигъ аьлакьйир арайиз хуб, вуздин диплом гъадабгъбан кьяляхъ ляхнихъди тямин апIру мумкинваларикан, образование-йин ерийин важиблуваликан мектебарин выпускникариз мялуматар тувуб ва гьацира, гележегдин пишекарвал ктабгъури, вузарикан ва факультетарикан фикир апIру вахтна дурари ДГУ-ра гьисабназ гъадабгъуб ву.
Дуфнайи хялари, ДГУ-йин факультетариъ фицдар пишекарвалар гъадагъуз мумкинвалар аш, зегьметнан рынокдиъ дурарин фициб игьтияж’вал аш, ктибтну.
Серенжемдиъ гьацира вуздин аьлимари чпин тажрубайихъди райондин мектебарин мялимар таниш апIру майдан арайиз хпан месэлара гьял гъапIну. Думу майдандиъ ЕГЭ-йин месэлйир гьял апIуз, видеоконференцйир ва образованиейин форумар гъахуз мумкинвалар хьиди. ДГУ-йин ва райондин администрацияйин арайиъ гъийитIу йикьрариинди, аьлимарин ва райондин мялимарин арайиъ мицдар гюрюшар кми-кмиди гъахуб ва майдандин ляхин тешкил дапIну, гьяракатнак кипуб планламиш дапIна.
Хялари заан классариъ урхурайидарин жюрбежюр суалариз яркьуди жавабар тувну.
Серенжемдин аьхириъ райондин кIулиъ айири мектебдиъ урхурайидариз аьгъювалариъ заан хъуркьувалар гъадагъурайидар ва жямяаьтлугъ ляхнариъ гьевеслудар Москва шагьриз «Урусат» выставка-форумдиз гьаъруваликан гъапну. Думу выставка гъюру йисан апрель вазлизкьан давам шулу.
«Му цирклиан ухьуз тажрубара ахьуз. Гъубшу йисан райондин администрацияйин дакьатарихъ Зейдулла Юзбеговдин ччвурнахъ хъайи математикайин олимпиадайин гъалибчйир ва пешкешнан йишвар гъадагъдар Москвайиъ айи уьлкейин варитIан ужудар вузариз экскурсияйиз гьаънийхьа», – аьлава гъапIнийи Мягьямед Къурбановди.
