Мейлан Нежефов
Халис шаирар халкьдин уьмриан гъягъюрдар. Дурарин уьмур чпин тамарзу ва, урхура кIури, ктатIарццру эсерариъ аьсрариинди давам шули гъубзру. Гьацдар шаирарикан ву диликIузди хъиршу шаир Расул Гьямзатовра.
Дагъустандин халкьдин шаирин сануринубдизра ухшар дару бикIбан хатI дугъан поэзияйин аьнтIикьавал йицIбариинди жара чIалариз илтIикIнайи шиърари, гьаци йицIбариинди жюрбежюр шагьрар, районариъ чаз дивнайи ядиграри, гьюкуматдин терефнаан тувнайи заан ччвурар тасдикь апIура.
Мидланра савайи, шаирин гьюрмат ва учв шаир фикриъ уьрхюри, Урусатдин кIулиъ айи В. В. Путинди гьар йисан 8-пи сентябри ихь уьлкейиъ Урусатдин халкьарин чIаларин йигъ къайд апIуз къарар адабгъну.
«Гъулан ва планетайин шаирин» гьюрматназ, уьлкейин вари пIипIариъ кIули гъахурайи серенжемарик Хив районра кидикьну. Райондин саки вари мектебариъ, бицIидарин багъариъ, библиотекйириъ ва культурайин хулариъ ачухъ дарсар, цалин газатар каъбан, шиклар зигбан, гергми столар, шаирин уьмрикан ва яратмиш’валин рякъюз бахш дапIнайи кроссвордар арцIбан, шиърар урхбан талитар кIули гъахура.
Хив гъулан А. Жяфаровдин ччвурнахъ хъайи кьялан библиотекайиъ лихурайи гъуллугъчи Тамила Байрамовайи райондиъ кIули гъахурайи серенжемарин гьякьнаан «Табасарандин нурар» газатдиз чан фикрар ачухъ гъапIну.
«Ав, гъи урхурайидари бабан чIалариз гъирагъ йивури ва негь кипрайи вахтна, уьлкейин кIулиъ айирихьан халкьарин чIаларихьна вуйи мициб лигуб аьхю гьюрмат ву. Мид’ин фукьан вушра рази вухьа. Гъит бабан чIалар хъана артмиш ишри.
Жара эсерарикан улхурира дарза, Дагъустан мялум дару халкьариз чан cаб «Кьарнйир» кIуру шиъриинди думу вари аьламдиз аьгъю гъапIу, вари вахтарин шаир вуйи Расул Гьямзатов насларихьан наслариз, аьсрариан аьсрариз ватанпервер касси нумунади гъузрубдин затра шаклу дарза. Уьлкейиъ гъахурайи вари ватанпервервалин серенжемар дугъан гьадму шиърин гафарилан ккергъра. Ухьуз мялум вуйиганси, ихь республикайин гимндихьна вуйи гафарра дугъандар ву. Йиз фикриан, республикайин сяргьятариин мицир шаир хьуб ихь варидин бахт ва дамагъ ву. Хъана дугъан ччвур кIваълан гьадрархуз чарйир агидихьа. Яшамиш ибшри Дагъустан ва Дагъустандихъан юкIв убгру касар», – гьевес кади гъанпийи библиотекайин гъуллугъчийи..
