Зубайдат Шябанова
Улихьна йигъари Урусатдин сборный командайин дахилнаъ айи Смоленскдин гьюкуматдин олимпийский резервдин училищейин студент шубар Шамала Селимова ва Амина Багадзиева ОАЭ-йин Фуджейра шагьриъ гъубшу спортдин тхэквондо жюрейин кчIихбариан вари халкьарин арайиъ вуйи турнириъ гъалиб гъахьну. Вари дюн’яйиз машгьур вуйи Fujairah Open талитариъ 60-тIан артухъ уьлкйириан 2000-тIан артухъ спортсменар иштирак гъахьнийи. Душваъ 49 кило гъагъ айи категорияйиъ Шамалайи сабпи ва 63 кило гъагъ айи категорияйиъ Аминайи кьюбпи йишвар гъазанмиш гъапIну. Дурари кьюриддира тренировкйир Мягьячгъала шагьриъ «Чемпион» спортдин клубдиъ гъахура.
Шамала Селимовайин абйир-бабар Табасаран райондин АхьитI гъул’ан ву. Гьамусяаьт дурар Мягьячгъалайиъ яшамиш шула. Спортдиин думу сифте чан адаш Жалили гьевеслу гъапIну, фицики, думура гьадму саб вахтна спортдиин машгъул духьну, жюрбежюр талитариъ ва чемпионатариъ иштирак шули гъахьир вуйи.
«Сифте вахтари узу спортдин гимнастикайиин, юкьяр дисбан кчIихбариин машгъул духьнайза. Хъа спортдиъ тхэквондойиин машгъул вуйи шубарихъди таниш гъахьиган, дурар гъягъюрайи «Чемпион» кIуру клубдиз узура гъягъюз хъюгъюнза. Ич тренер Тимур Багадзиевди учуз тхэквондойиан вари къайдйир улупуз чалашмиш шула. Тхэквондойин клубдиз гъюруган, йиз 12 йистIан дайиз. Дидхъанмина 4 йис гъубшну. Му йисарин арайиъ узу хайлин талитариъ иштирак гъахьунза. Сифте шагьрин, хъасин Дагъустандин, СКФО-йин талитариъ сабпи йишвар гъазанмиш гъапIунза. Дурарин кьяляхъ цци Казань шагьриъ Урусатдин талитар гъахьнийи. Узухъди клубдиъ айи тмуну шубарра вари чпин гъагънан категорйириъ чемпионар ву. Магьа сар риш гьаму йигъари Европайин чемпионатдиъ иштирак хьуз Швейцарияйиз гъягъюра. Хъа узуна сарсана риш июлин вазли Иорданияйиз сборариз гъягъюз гьязур шулача. Гьадушваъ кьюб гьяфтайин арайиъ сборар шулу. Дидин кьяляхъ, Иорданияйин гьюкуматдин кIулиъ айидари варихалкьарин арайиъ вуйи чемпионат тешкил апIуру. ОАЭ-йиъра гъабхьиб гьациб турнир вуйи.
Эмиратариъ гъабхьи варихалкьарин талитариъ йиз гъагънан категорияйиъ 80-рихьна спортсменар айи. Вари дестйириз жара гъапIну. Узу Узбекистандиан, Казахстандиан, Тунисдиан, Аьрабарин Эмиратариан вуйи спортсмен шубарихъди хьуб ражари талитариз удучIвунза.
Вари спортсменар чпин уьлкйириъ чемпионар ва бегьем гьязур духьнайидар вуйи. ВаритIан гъагъи кчIихбар Тунисдиан вуйи шурахъди гъахьнийиз. Мидланра савайи, талитар ккергъайиз Фуджейра шагьриъ кьюб гьяфтайи сборариъ гъахьунча. Душваъ сппарингариъ гьадму шурахъди кьюбан талитариз удучIвунза. Чемпионатдиъ узу дугъахъди удучIвруб аьгъдайзуз. Кьюбиб ражари думуган узу магълуб гъахьнийзу. Хъа чемпионатдиъ вари кьувватар уч дапIну, йиз гъалатIар ва дугъан мумкинвалар гьисабназ гъадагъну, кчIихбар гъухунза», – ктибтнийи Шамалайи ич сюгьбатнаъ.
Шамалайи Смоленскдин гьюкуматдин олимпийский резервдин училищейин сабпи курс ккудубкIну. Училищейиъ дугъу заочно урхура. Дугъаз спортдин устад хьуз, бицIи шубар спортдиин машгъул апIуз, дурариз кчIихуз улупуз ккунду.
Талитариан гъюбан кьяляхъ Шамала Европайин ва варидюн’яйин чемпионар – Гюгьрягъ гъул’ан вуйи Мягьямад Гьямидовдихъди ва Дарвагъ гъул’ан вуйи Шамиль Абакаровдихъди Табасаран райондиъ ужуди къаршуламиш гъапIну. Думу йигъан райондиъ Кьалухъ Мирзайин ччвурнахъ хъайи спортдин дараматдиъ грекаринна риммарин кчIихбариан варихалкьарин классдин спортдин мастер, гизаф ражари дюн’яйин чемпион Эмирбег Мягьямедбеговдин пешкешариз вуйи юкьяр дисбаан республикайин ачухъ турнир кIули гъябгъюрайи. Турнирин дахилнаъ серенжемдиз теклиф дапIнайи шубрид спортсменариз Табасаран райондин глава Мягьямед Къурбановди гьюрматнан грамотйир ва пешкешар тувну.
Гъит чан аьхю бабан ччвур али бажаранлу ва дирбаш Шамалайиз, гележегдиъ Олимпиадайин талитариъ иштирак духьну, гъалибвал гъадабгъру ва ихь вари уьлкейи аьхю хушниинди къаршуламиш апIру йигъар кьисмат ишри.
