Умгьанат Сулейманова
Духтирвал гизаф лайикьлу ва инсанвалин пише ву. Му ляхин анжагъ бажаранлу касарихьантIан апIуз шлуб дар. Дурар дурумлу ижмишнаан гъалибвалихъ хъугъвал айи хасиятнан инсанар ву. Гъи магьа ухьуз рябкьюрайиганси, жвуван уьмур аьхю хатIайикк шлуваликан хабар ашра, саспи духтрар дявдин женгар гъягъюрайи йишвариз зийнар духьнайи эксрариз кюмек апIуз гьялакшула. Гьадрарикан сар ихь ватанагьли, медицинайин гъуллугънан капитан Мурадхан Мурадханов ву.
Мурадханов Мурадхан Ширинбегович 1989-пи йисан Дагъ. Огни шагьриъ бабкан гъахьну. Думу, чпин кьюр гъардаш ва сар чи айи хизандиъ аьхюну бай ву. 2006-пи йисан мектеб заан аьгъювалариинди ккудубкIну, думу Санкт-Петербургдиъ ерлемиш дубхьнайи С.М. Кировдин ччвурнахъ хъайи Военно-медицинский академияйин (ракетйирин ва къураматдин кьушмарин) факультетдик урхуз кучIвру. Ва 2014-пи йисан Мурадханди вузра заан аьгъювалариинди ккудубкIну.
Украинайиъ гъябгъюрайи хусуси метлеб айи дявдин операция давам шули, шубуд йискьан ву. Думу ккебгъну саб бицIи арайилан Мурадхан ДНР-из кIул’инди тешкил гъапIу дестейин асас хирургди гъягъюру. Кьюбпи ражари думу ЛНР-из командировкайиз гъушну.
Мурадхандихъди вуйи сюгьбат анжагъ телефондиан вуйиб ва жикъиб гъабхьнийич, фицики йиз хайлин суалариз дугъу жавабар тувундайи (дявдин сир ашкар апIру мялуматар тувуз ихтияр адарзуз гъапнийи).
– Узу медицинайин гъуллугънан капитан, Кьибла федеральный округдин 419-пи военный госпиталин филиалин травматологияйин отделениейин начальникди ляхин апIураза. Ляхин фукьан вушра ачуз. Магьа багарихьди узу нубатнан командировкайиз гьауз кка кIури хабрар а. Узуз йиз пише гизаф кьабулди вуйиз, амма кьюбпи камандировкайиъ гизаф йиз кIваз хуш дару дюшюшарин шагьид гъахьунза.
Сабпи дюшюш. Узухьна Кьягьялвалин ордендихъди лишанлу дапIнайи 25 йис бегьем яшар дархьи офицер дишагьли гъахнийи. Дугъан бедендин зийнар гъяркъиган, тяжуб гъахьнийза – гьадмукьан читин гьялнаъ айи думу бейнава, чIивиди гъудрузур кIури, хиял гъабхьнийиз. Дугъан операция 3-4 сяаьтна давам гъабхьнийи, госпиталин шартIарра думукьан ужуб гьялнандар дайи. Гьаци вушра, учхьан удукьрубси операцияра гъапIнийча, дугъан саб ликра ккадабтIнийча. Дишагьлийин рудрарра вари чIатинди адахьнайи. Кьюд йигълан думу офицер дишагьли вертолетдихъди Москвайиз гъухнийи.
Кьюбпи дюшюш. СацIиб вахтналан затра шартIар адру госпиталиъ операция апIуз зенг гъафнийиз. Дина йисирвализ гъадагънайи украинайин диверсант дишагьли духнайи. Фу лигурва, дугъан кьюбрид ликарра лап харабди вуйи, сабну лик чарасуз ккадабтIну ккундийи… Яман ижми хасиятнан дишагьли вуйи. Чан дадайи Украинайиан зенгар апIури, операция гъабхуз ихтияр туврашра, «операция апIурдарза» кIури, инкар духьну дугъужву. Дюз гъапиш, диверсант дишагьлийин дадайи, чан риш ихь духтрарин хилиъ ахъбаз гизаф рази вуза кIури гъапнийи, амма риш саризра мютIюгъ гъахьдар. Сарун, дишагьлийин язухъ ву дупну, дугъаз иццрушин кар апIру рубар йивну, думу ихь эскрари чпин терефназди алдаънийи.
ЖилижвувтIан дишагьли зяиф кас ву. Хъа душман вушра, думу фуж вуш, миллет фунуб вуш абгуб лазим дар – духтрин вазифа зяиф касдиз кюмек апIуб ву. Зийнар духьну, цIуза зигурайи эскрари кми-кмиди, «жан дада» кIури, дадайиз дих апIури шулу. Хъа гъи узкантина кюмек гъабхьи дишагьлийирра гележедиъ дадйир хьуз имбудар ву.
– Хъа яв гъуллугънаъ, Мурадхан, ихь йишвариан вуйи баярин операцйир апIуб алабхъунуз? Ва уву фуж вуш, аьгъю гъахьидар айин?
– Дявдин майдандиан госпитализ хурайи жигьил живанарин арайиъ ихь ватанагьлийирра цIиб адар. Узу ихь ватандин адми вуйиб аьгъю гъабхьиган, операция ккебгъайиз, «уву ихь ватанагьли духтир багахь хьайивалиан ич зийнар сагъ шул кIури, аьхю умуд кивурча», кIури шулу. Мамедгъалайан вуйи жигьилин операция гъапIунза, Дагъ. Огни шагьриан вуйи, СВО-йиз чпин хушниинди гъафи узутIан яшнан аьхю швнур-сар касди, йиз фамилия аьгъю гъабхьиган, флани касдин бай вуна кIури, гьерхри гъахьну.
– Аллагьди хиларихъ кьувват хъиврияв, Мурадхан.
