Мейлан Нежефова
Ухьухь кIури шулу: «Гьар кьувватлу ву ччивариинди, хъа инсан — дустариинди». Дугъриданна гьаци хьузра ву. Вафалу дуст айивал гьарсар касдин аьхю бахт ву. Гъит думу бахтнан тIяам вари аьламди дадмиш апIри!
Ихь уьлкейиъ 9-пи июнь Дустарин йигъси тяйин дапIна. Дустарин йигъан шилнаъди, гъийин йиз макьала Урусатди Украинайин жилариин гъабхурайи хусуси метлеб айи дявдин операцияйиъ жюрэтлувал улупу, улихьна чиб-чпиз зат таниш дару, хъа гъи, гьадму мусибатнан йигъарин кьялхъян улдукьу дустар духьнайи кьюр касдикан хьибди.
Дурарикан сар ихь ватанагьли Мевлюдин Гьямзатов (шиклин арччул терефнаъ) ву. Чпин дустваликан дугъу гьамци ктибтура: «Узуси, Евгений Боярскихра ктабхъу йисан 15-пи декабри жвуван хушниинди операцияйиъ иштирак хьуз гъафир ву. Ич десте 35 касдикан ибарат вуйи. Учу вари сар-сарихъди таниш хьпан кьяляхъ, мурарин арайиъ узуз юкIв дипну гаф-чIал апIру кас айибдин гъавриъ ахъунзу. Гьадму йигъланмина Евгенийдихъди дуствал ккебгъунча. 2024-пи йисан 24-пи январи учу кьюридра сабси нубатнан ражари постниина гъаравулвализ гъушнийча. Юкьуб кIуру суткайиъ гъаних душмнарихьан гъюрайи дронарихьан гъагъи зиян гъабхьнийзуз. Зизкьихъансина арччул ликрихъ мягьрум гъахьунзу.
Гьадмуган саб йишвхьанра кюмекназ ккилилигди, 4 километр ярхлаъ айи ич жилин хулаз гъяйизкьан йиз сарпи духтирди Евгений гъахьунзухъ. Якьинди кIураза: дугъан гьунар гъабхьундайиш, узу гъи чIивиди гъузру кIуру гаф кучIал шлийи. Гьамциб тербия туву адашиз ва дадиз нур убгъричан. Ихь абйир-бабари чпин тахаллусариъ гьаци кьастIан кIурайиб дар: «Дуст адар – аг, хъа гъидихъур – уьрх!» Гьамцир кас уьмриъ алахъуб йиз аьхю бахт гьисаб апIураза. Февралин вазли дугъазра аьхю зийнар гъахьну. Кьюридра аьзарханайиъ ади, ипIру уьлра, убхъру шидра сабси пай апIурача. Дуствал, суфрайихъ дусну, гьаци къуру гафариинди уьбхюз даршлуб Евгенийдин хасиятнаъ атIабгнайибдин гъавриъ гъахьунзу. Дугъахъди вуйи дуствали чан гьякьлу лишан ва сурат лазим вуйи дакьикьайиъ яракар хьувалиинди улупунзуз. Гьаци, гъийихъанминара «увуз – жвугъри, узуз – мишмиш» дарпиди ва «увуз айиб узуз гьаз адар?», «узу увуз гъапIубдин, тувубдин гьацIсибкьан гъапIундарва узуз», «накь узу увухьна гъафунза, гъи уву узухьна гъач» кIуру гафар-чIалар арайиъ адарди, янаки, мянфяаьтлувализ ваъ, хъа анжагъ, вафалу дуствалиинди кьюридинра арайиъ гъабхьи дердра, шадвалра гьарури чанубси гьисс апIури, уьмрин йигъар аьхирихъна гъяйиз сар-сарихъди гъузуз жиларин гаф тувунча. Магьа хьуб кIуру вазли узу ликриин гъахьунзу. Гьаци думура лиикриин шул. Шюкюр Аллагьдиз», – ктибтура, хъугъвал али дуст алахъуб чан бахт вуйиз кIури, Мевлюдинди.
КIваин апIуз ккундузуз: Мевлюдин Гьямзатовдин хизандин бина Хив райондин Асккан Яракк гъул ву. Хъа гьамусяаьт дугъан хизан Сюгют гъулаъ яшамиш шула. Дугъкан вуйи йиз «ЦIийикIултIан ликриин шул пну, умуд кивраза…» кIуру макьала 2024-пи йисан 9-пи феврали удубчIву, «Табасарандин нурар» газатдин №5-пи нумрайин 4-пи машнаъ урхуз шулу.
Хъа цци йисан 4-пи июнди райондин агьалйирин ва администрацияйин терефнаан, фу лазимди аш, адарш суракь апIури, Мевлюдиндин хизандиин улукьуз райондин глава Ярмет Ярметов хялижв гъахьнийи. СВО-йин иштиракчйирихьна, дурарин хизанарихьна ва багахьлуйирихьна администрацияйин терефнаан айи фикирназ, хатир-гьюрматназ газатдин терефнаан чухсагъул мялум апIурача.
