Зубайдат Шябанова
Урусатдин агьалйиринси, вари дюн’яйин инсанарин фикирра гъи хусуси метлеб айи дявдин операцияйиина жалб дубхьна гъапишра, гъалатI шулдар. Гъи дугъри игит жилар кIуру ччвурназ лайикьлудар, хусуси метлеб айи дявдин операцияйиъ ихь Ватандин маракьар уьрхюри, Украинайин ва Западдин уьлкйирин гьяракатариз къаршуди дийигънайи ихь эскрар ву. Гьаму гъагъи вахтна ихь баяр багъри Ватандиъ ислягьвал ва саламатвал уьбхюз кIваъ ниятар ади, СВО-йиъ чпин жигьилвал, уьмур туври, гъийин миллетчйирихъди игитарси женгнаъ а.
«Табасарандин нурар» газатдин саки гьарсаб нумрайиъ учу дявдиъ айи ихь ватандаш баярикан мялуматар туврача. Наан ашра, дурар сагъ-саламатди чпин хизанарихьна гъюри. Хъа, гьяйифки, вари гъюрадар. Хусуси метлеб айи операция ккебгъу йигъланмина гъийиз Табасаран райондиъ 100-дихьна игит эскрар гъийихну. Дурарикан сар аьхюну сержант Жяфар Гьязаров ву.
Багъри Ярса гъулаъ 1996-пи йисан мектеб ккудубкIубси, Жяфар Гьязаров Урусатдин Яракьлу кьувватарин жергйириз гъухнийи. Армияйиъ айи вахт аьхирихъна гъафиган, му, контрактдиин къул дизигну, эскервалин гъуллугъ давам апIури гъузру.
2000-пи йислан 2005-пи йисаз Ж.Гьязаров Мягьячгъала шагьрин ОМОН-диъ, хъа 2009-пи йисланмина Чечен республикайин Шали шагьриъ айи военный дивизияйиъ инженерарин гъуллугънан начальникди лихури гъахьну ва 2017-пи йисан пенсияйиз удучIвну.
2022-пи йисан хусуси метлеб айи дявдин операция ккебгъу вахтна, думу «Вагнер» ЧВК-йин дестейиъ учIвру ва Бахмут азад апIбан бадали вуйи женгариъ иштирак шулу. Душваъ дугъаз гюлйирин зийнарра гъахьнийи. Думу женгарин кьяляхъ Жяфар Гьязаров «Бахмут бисбаз лигну» медалиинди лишанлу гъапIнийи.
«Вагнер» ЧВК рабгъбан кьяляхъ Жяфар Гьязаров хулаз гъюру. Амма игитрин юкIв хулаъ сикин шуладайи. Саб бицIи вахтналан думу жвуван хушниинди хъана СВО-йиз гъягъюру. 2023-пи йисан ноябрь вазли гъати женгариъ Жяфар Гьязаров игитси кечмиш гъахьнийи. Думуган ихь ватанагьийин 45 йистIан дайи. Шубур велед саб дупну адашдихъ мягьрум гъахьну, хъа уьмрин юлдаш уьмурлуг кIарубдиъ учIвну.
Улихьна йигъари Табасаран райондин глава Мягьямед Къурбановди ачIни гъахьи хпирихьна ва дурарин аьхюну балихьна аьхюну сержант Жяфар Гьязаровдин Кьягьялвалин орден тувну.
Ярса гъул’ан вуйи Жяфар Гьязаровдиз му орден, дявдин женгариъ Ватанди чан улихь дивнайи месэлйир гьял апIурайи вахтна улупу дирбаш’вализ, кьягьялвализ, фидакарвализ лигну, йикIбан кьяляхъ тувнийи.
Игитрин орден багахьлуйирихьна тувру серенжемдиъ, райондин главайилан гъайри, дугъан заместитель Ринат Мирзабалаев, Табасаран райондин военный комиссар Садикь Мурадялиев, жямяаьтлугъ тешкилатарин вакилар ва кечмиш гъахьи эскрин багъри гъардшар Сиражудин ва Маркас Гьязаровар иштирак гъахьнийи.
Гюрюшдиъ Мягьямед Къурбановди багахьлуйириз башсагълугъвалин гафар кIури, сабур ва мюгькам сагъвал ккун гъапIну, игитрин хизанариз гележегдиъ чпихьан шлу кюмек тувруваликанра гъапну.
«Хусуси метлеб айи дявдин операцияйиъ гъийиху ихь вари эскраризси, Жяфар Гьязаровдизра улихьнаси Ярса гъулан мектебдин цалик мармардашдин тахта ачмиш гъапIунча. Му ляхин аргъаж шулайи наслиз, гъуландариз дугъан игитваликан аьгъю хьуз, дугъ’инди дамагъ апIуз ва дугъаз барабардар хьуз гъабхурайиб ву.
Гьяйифки, аьжал адру дяви шлуб дар. Ихь ватандашди му заан ччвурнахъан чан уьмур тувну. Думу багъри гъуландарин ва ихь варидарин юкIвариъ уьмурлугдиз игит вуди гъузди. Багахьлуйиризра гьаму орден чпин бай, жилир, адаш, гъардаш – игит ва дирбаш, кьувватлу ва фидакар касси кIваъ уьрхру багьалу лишан вуди гъубзди», – гъапнийи Мягьямед Къурбановди.
Къайд дапIну ккундуки, Гьязароварин сарсана гъардашра, Кьудратдин Гьязаров, военный контрактдиинди гьамусяаьт хусуси метлеб айи дявдин операцияйиъ Запорожский терефнаъ а.
Гюрюшдиз дуфнайи гъачIи эскрин гъардшари райондин главайиз вари хизандин терефнаан чухсагъул мялум гъапIну ва чпи яшамиш шулайи кючейиин СВО-йиъ гъакIи чвуччвун ччвур иливуз ва гъулаъ Жяфран шикил кайи баннер кебхуз шулуш, гьерхнийи.
Мягьямед Къурбановди думу месэлйир гьял апIуз кюмек тувуз гьязур вуйиваликан ва кючейиз гъакIи эскрин ччвур тувру къайдйириз дилигну ккунибдикан гъапну.
Мягьямед Къурбановди му месэлйир чан заместитель Ринат Мир-забалаевдиз ва Ярса гъулан поселениейин глава Аьбдулла Аьбдуллаевдиз сатIиди гьял апIуб табшурмиш гъапIну.
