Умгьанат Сулейманова
Табасаран райондин Халагъ гъулан агьали, Ватандин Аьхю дявдин иштиракчи Гьясан Ражабовдихьна, думу чIивиди имиди, дявдин вахтарикан ктибтуб ккун апIури, кми-кмиди мектебдиъ урхурайи баяр-шубар, журналистар гъюри шуйи. Гьар ражари читин йисарикан чан ихтилат ккудубкIбан кьяляхъ, дугъу «дявдин сес ктрубкIричвук, жан баяр» кIури шуйи. Гьяйифки, аба аьхиратдиз душну, сад йисна гьацI вахтналан дявдин учIврушин дугъан балин хизандира гьисс гъапIну.
Ватандин Аьхю дявдин игитрин хтул, хусуси метлеб айи дявдин операцияйин иштиракчи Ризван Ражабов 2023-пи йисан 13-пи майдиъ Донецк Халкьдин Республикайин Никольский гъулан ругариин, чвевалин халкьар миллетчйирихьан азад апIбан женгариъ, халис игитси уьмриан гъушну.
Гъалибвалихьна рякъ гизаф гъагъиб ва ярхиб вуйиштIан! Ватандин Аьхю дявдин йисари Советарин Союздин халкьари зурба игитвал улупну. Гъи магьа, думу игит деврин аьдатар давам апIури, дагъустанлуйири цIийикIултIан Ватандиз чпин вафалувал улупура.
Ужудар чагълариъ айи баярихъ мягьрум гъахьи абйир-бабарин юкIвариъ арабгънайи учIврушнихъди тевуз шлу учIврушин дюн’яйиъ адаршул! Гьаци вуйиган, хусуси метлеб айи дявдин операцияйиъ гъийиху жигьил эскрарикан макьалйир дикIруган, мялумат гъадабгъуз дурарин лап багахьна вуйи мирасарихьнара илтIикIури шулза. Ризван Ражабовдикан узуз мялумат тувур Дагъ. Огни шагьриъ дуланмиш шулайи дугъан эме Зубайдат вуйи.
Ражабоварин хизандиз гъи гизаф аьхю дерд ва хажалат дубхьна. Рамазан Гьясановичдин ва Сефият Маллашябановнайин хизандиъ веледарикан жили кIул анжагъ сар Ризван вуйи, имбудар шубар ву – Милана ва Жемият.
Ризван 2000-пи йисан 9-пи июнди Табасаран райондин Халагъ гъулаъ бабкан гъахьну. Мектеб кудубкIбан хъяляхъ, 2019-пи йисхъанмина дугъу Забайкальский крайдиъ Борзя шагьриъ айи 06705 нумрайин частнаъ пулеметчикдиъ гъуллугъ апIури гъахьну. Эскервалин буржи тамам гъапIхъан, Ризван Ражабовди 2020-пи йисан контракт йибтIуру. Думуган сержант звание туву Ризван мотострелковый кьушмариъ батальондин отделениейин командирди дерккру. 2022-пи йисан майдин вазли думу, гъуллугънан буйругъ тамам апIури, жикъи вахтнан арайиъ эскрар вердиш апIбан бадали, Беларусдин сяргьятарихъна гьаъру. Ватандин улихь чан буржи заан дережайиъди тамам апIури, думу, душмнарихъди вуйи кчIихбариъ кьягьялвалин нумуна улупну, вахтсузди уьмриан гъушну.
Ризвандин абйир-бабариз, дурарихъди сабси чпин баяр дявдин женгариъ талаф гъахьи имбу абйир-бабаризра сабур ва сагъвал ккун апIурхьа.
