Айгуль Мягьямедова
Венера Къазанбеговна Сефербегова журналист, фильмйирин автор ва продюсер, PR-пишекар ва блогер ву. Венерайи чан блогдиъ учв табасаран дишагьли вуйиваликан кIури гъеебхьиган, узу дугъахъди таниш духьну, сюгьбат гъубхунза .
Венера Сефербеговайин абйир-бабар Табасаран райондин Куркакк гъул’ан Билижийиз удучIвну гъафидар ву, Венера учв Билижийиъ бабкан гъахьну. БицIивахтнахъанмина абйир-бабари хизандин мадар апIури, яр-йимишар масу тувуз гъягъруган, хулаъ яшнан аьхюнур вуйи Венерайи чвйир-чйириз хъайивал апIури гъахьну. Гьаддихъанмина жавабдарвал дугъан хасиятнан лишан ву пуз шулу. Шуру Герцендин ччвурнахъ хъайи университетдин психологияйин факультет заочно дурхну ккудубкIну.
– Венера Къазанбеговна, уву Москвайиз фици алдахънуш, журналиствалин ляхнихъ фици хъюгънуш, кидибтава.
– Узу 2021-пи йисан финансарин пирамидайин балайикк ккахъур вузу. Думу пирамида тешкил гъапIдарилан суддиз иск тувуз мажбур гъахьнийзу. Магьа силисар гъахури шубуд йистIан артухъ ву. Жарадарин буржар йиз кIул’ина гъадагъунза. Гьаци гъапIундайиш, йиз ччвур кабцIуз гучIуйзуз. Къанундиз асас вуди, жарадарин буржар кIул’ина гъададагъди гъузуз шуйзухьан. Хъа узуз гьялалди уьл ипIуз, саламатди нивкI апIуз, инсанарин улихь кIул за дапIну лицуз ккундузуз. Узуз кучIал гъапIдарилан суддиз аьрза дибикIну, Москвайиз удучIвну гъушнийза. Москвайиз гъафибси, НТВ-йиъ ляхниъ учIвнийза. Душваъ гвачIнин сяаьт 6-диан гьацIишваризкьан ляхин дапIну ккундийи. Узуз рягьятвал тутрувру дициб ляхин кьабулди дайзуз. Мидланра савайи, социальный сетариан узу НТВ-йиъ лихурайиваликан мялум гъабхьиган, йиз кьяляхъ хъергнайи лутйири узу ляхин апIурайи йишваз телефондиан зенгар апIури, йиз ляхниз манигъвал апIуз хъюгънийи. Коллективдиъ гьюрмат адру йишваъ ляхин апIузра ккундайзуз. Кьюб гьяфтайилан узу НТВ-йиан ляхниан удучIвнийза.
Саб дюшюш дубхьну, машгьур предприниматель, миллионер Сергей Хитровдиз лазим вуйи касдин телефондин номер абгуз кюмек апIуз гъабхьнийзухьан. Гьадмуган узуз компанияйин ва бренддин арайиъ хайирлу аьлакьйир дерккру (пиарин) ляхнариз рякъяр ачмиш гъахьнийи. Дугъу узуз октябрин вазли шлу чан форумдиз билет багъиш гъапIнийи. Гьадму форумдиз гъягъруган, эгер узуз мялуматарин дакьатариъ материал бикIуз хайирлу мумкинвал гъабхьиш, му ляхин давам апIуз, дархьиш Дагъустандиз кьяляхъ гъюз жвуву жвуваз гаф тувнийиза.
Форумдиъ сар жигьил алахънийзуз. Думу Египетдиан «Самсунг» компанияйин топ-менеджер вуйи. Узуз инглис чIал аьгъдайзуз, вушра, Интернетдиан таржума апIури, дугъхьан Урусатдин мялуматарин дакьатариъ мянфяаьтлу макьалйир дидикIну ккундуш, гьерхнийза. Дугъу чан разивал тувнийи. Дишла йикьрар гъапIнийза: дугъу узуз 20 агъзур манат тувру, хъа узу дугъкан федеральный мялуматарин дакьатариъ 2-3 макьала дикIурза. Дугъу узхьан, гьапIуз мици ис кьимат кIураш, гьерхнийи. Узу, думу йиз сарпи муштари вуйиваликан гъапнийза. Хъа йигъан йиз муштарийи, ужуб багьалу машиндиъди дуфну, тумаждин кисе адабгъну, 5 агъзурин кIажар кудухну, узухьна тувнийи.
Образование адарди, сарпи муштари гъадагъуз гъабхьиган, гъавриъ гъахьнийзу: узхьан ляхин апIуз хьибди. Думуган юлдаш шурахъди сатIиди пулихъ хал дибиснайча, пулра хилиъ абхъиган, таксийиз дих дапIну, хулаз гъушза. Рякъюъди, юлдаш шураз, гьамус уьмрин цIийи рякъ ккебгъраза, кIури гъибикIнийза. ЦIиб вахтналан ЦIийи йисандин улихь кьюрпи муштарира гъидихънийзуз. Дугъахъди вуйи йикьрари узуз 170 агъзур манат гъабхнийи. 2022-пи йисра улубкьу. Думу йисан узу гъизгъинди ляхин апIури гъахьунза, пулин дакьатарра бегьем гъазанмиш гъапIнийза. Москвайиз узу жарадарин буржар кади гъафнийза, гьаддиз гъазанмиш гъапIу пуликан йиз ва жарадарин гизаф буржар ктирчнийза. Гьадму ляхниин швумалра гъахьундарза.
– Машгьур касарихъди гюрюшмиш шули, дурар муштарйирди дисуб читинди дарин? Думу ляхин фици удукьуравуан?
– Машгьур касарихъди гюрюшмиш хьуб йиз ляхнин асас пай дар. Хъа эгер лазим гъабхьиш, пландихъди ляхин гъабхурза. Моника Белуччийихъди (италияйин актриса), Шах Рукх Кхандихъди (индияйин машгьур актер), Бурак Озчивитдихъди (турцияйин актер) ва жара машгьур инсанарихъди интервью дубхну, ич дестейи материалар гьязур гъапIунча. Аьрабарин СатIи вуйи Эмиратариан хайлин машгьур касарихъдира гизаф ражари гюрюшмиш гъахьунча. Думу материалар Ютуб-каналариъ ирчрача. Харжар вари узу гъахураза.
Инсандин чав апIру ляхнихъ юкIв хъади ккунду. Мидланра савайи, чахьан ляхин удукьур кIури, хъугърира ккунду. Эгер узкан улхуруш, узуз ккун гъабхьи ляхин кIулиз адабгъуз миж кайиз. Узуз читинди дарзуз. Машгьур инсанарра аьдати, фурс кадру инсанар ву. Гьадрар иштирак шлу серенжемариз билет гъадабгъбан кьяляхъ, дурарихъди йикьрар апIуз шулу. Узуз гизаф йишвариз теклифар апIура. Эгер пулин дакьатарин кьитвалин месэла дайиш, узу вари дюн’яйиз машгьур хьидийза (аьлхъюра).
– «Дишагьлийин бахт» кIуру гафарин фици гъавриъ ашулва?
– Узу шубур веледдин дада вуза (гъачIи сар веледра кади). Йиз фикриинди, дишагьлийин бахт я жили жвувахъди, я жарадарихъди аьлакьалу дар. Эгер дишагьлийихьан фунуб идарайизра сарди гъягъюз шулаш, дусну ицциб кофе убхъуз, ицциб хураг ипIуз, дусну ккуни ляхин апIуз (гьамусяаьт яв суалариз жаваб туври дусназа) шулаш, гьадмура бахт ву. КIваантIан инчI ккадапIуз шулаш, инсан бахтлу ву. Саб ражари Турцияйиъ Босфорин гъирагъдиъ лицури гъахьунза. Ибариин иливрудар алахьну, йиз ккуни мукьам кивнайза, юкIвра ялхъван апIузкьан шадди айиз. Гьадмура бахтлу геренарикан саб ву, гъавриъ шулайва?
Ав, йиз уьмриъ вари узуз ккуниси даршра, узу бахт гьисс апIурайза. Гьамусяаьт Москвайиъ йиф а, узуз аьхълушин ккуниб дарзуз. Даршиш гьамусяаьтра узу кючейиз удучIвну, бахт гьисс апIуйза. Вари инсанаринси, йизра гизаф ляхнар дапIнадариз, вушра узхьан вахтназди гьадрарикан гьархуз, узу гьаму дюн’яйиъ сагъ-саламатди айивалиин гьяйран хьуз шулзухьан. Гьаму дюн’яйиз, инсанариз уж’вал апIуз шулайивалиин шад вуза. Узуз асасуб, дишагьлийи чан бахт жилирикан асиллу хьуз гъидритуб вуйиз. Эгер дишагьлийин бахт жили жвувкан асиллу вуш, думу дишагьлийин бахт дар. Узу жилирихь хьайигантIан, гъийин вахтна артухъ бахтлу вуза.
– Венера Къазанбеговна, гележегдиз фицдар планар диврава?
– Турцияйин продюссерарихъди документально-художественный фильм адабгънача. Гьаму гьяфтайи узу гизаф пул уч дапIну ккунду. Вари харжар узу адаураза, спонсорар адарзуз. Фильм адабгънача, монтаж дапIну ккунду. Думу ляхниз 650 агъзур манат харж хьибди. Думура узу тувру пул ву. Фильм удубчIвиган, думу гизафдариз кьабул хьибди. Премьерайиз тюркарра гъиди, гъабхьиш учвузра теклиф апIурза. Гележегдиъ Ургур чвуччвун ва сар чуччун гъалайикан фильм адабгъбанди вуза. Гьадму нагъил экранариз адабгъиш, гизаф ужуйи хьибди. Шли фициб роль уйнамиш апIуруш, фикир дапIназа. Сабпи фильмдин премьерайин кьяляхъ, хьадну гьадму фильмдиин лихуз хъюгъбанди вуза. Дидхъантина вуйи планарикан ктибтузра ккундарзуз, хъа гьаму йисан аьхириз долларовый миллионер хьуб, вари дюн’яйиз машгьур, пиарин тарихдиз тясир гъапIу медийный пиарщик хьуб метлеб вуйиз. Йиз гъарашугъари апIурайи ляхинтIан заан ери айи марцци ляхин апIуз кказа. Чиркин саягъ лихури, ярхлаз гъягъюз шулдар. Марцци машгьурвал ккуни чIатху брендар ва фирмйир илтIикIру коммуникационный агентство тешкил апIуз кказа. Фильмйир адагъури, дюн’яйиъ варитIан машгьур табасаран дишагьли хьуб йиз метлеб вуйиз.
– Увуз социальный сетариъ лигурайидар, увухъ хъпехъурайидар гизафси жигьилар ву. Гьадрариз фу пуз ккундувуз?
– Гьарсар касдикан, бицIи вахтнахъанмина чаз фу ккундуш, фициб пишейихъ юкIв хъаш, кIваинди гъибтуб, гьаддин гъавриъ хьуб ккун апIураза. Уву яв улихь дивнайи метлебнахъ хъуркь, гьаддиъ яв бахт бихъурвуз. Узу бицIи вахтнахъанмина журналист, телеведущий шулза кIури гъахьунза. Адашдин китабар гъадагъури, хулан раккин хъябкьну, дурар урхуйза. Екатерина Андреева (сабпи каналин диктор) вуза кIури, гафар апIуз, ктибтуз дубгъуйза. Думу ляхин гизаф кьабулди вуйзуз. Узу йиз кIваъ айи мурадарихъ хъуркьунзу. Гъит гьарсар касдиз чан бицIивахтнан метлеб кIваинди гъубзри ва думу чан мураднахъ хъуркьри. ГучI мапIанай, инсандиан фуну ляхинра удубкьрувалихъ хъугъай.
– Венера Къазанбеговна, яв учIубкьнайи графикдиъ йиз суалариз жавабар тувуз вахт абгувализ чухсагъул. Яв кIваъ айи метлебар кIулиз удучIврияв. Дагъустандиз гъафиган, «Табасарандин нурар» газатдин редакцияйиз хялиш хьуб ккун апIурача.
