Наргиз Гюлечова
28-29-пи октябриъ Каспийск шагьриъ Алферовдин ччвурнахъ хъайи кючейиъ ерлешмиш дубхьнайи «ЭНЕРГИЯ» спортдин талитар гъахьру спортдин дараматдиъ Урусатдин Игит ва Луганск Халкьдин Республикайин Игит генерал-лейтенант Эседуллагь Абачевдин гьюрматназ вуди жиларин ва дишагьлийирин арайиъ хилариинди кчIихбан спортдин жюрейин Дагъустандин чемпионат кIули гъябгъиди.
Республикайин мяна айи спортдин серенжемдин тешкилатчи, Хабаровский крайиъ айи Дагъустандин Правительствойин вари ихтиярар айи вакил Бейдуллагь Исаев ву. Талитар Урусат Федерацияйин Государственный Думайин физический культурайин ва спортдин комитетдинна Дагъустан Республикайин правительствойин ва Каспийск шагьрин депутатарин собраниейин кюмекниинди кIули гъахиди.
Чемпионатдин тешкилатчийи «Табасарандин нурар» газатдиз туву мялуматариинди, му жюрейиинди спортдин талитар республикайиъ сабпи ражари вуди кIули гъахурайидар ву. Чемпионатдин асас метлеб – Урусатдин Президент Владимир Путиндин, хусуси метлеб айи дявдин операцияйиъ иштирак шулайи ихь эскрарин, ватанпервервалин ва сагъу уьмур хъапIбан тереф уьбхювал ву.
«Сач му чемпионат учу Хив кIули гъубхунча. Хъа цци кIуруш, иштиракчйириз мина гъюз рягьят хьпан, артухъси спортсменар жалб апIбан ва талитар яркьу апIбан бадали, Каспийскдиъ гъабхуз йикьрар гъапIунча.
Асас вуди чемпионатдиъ иштирак шулайидар, республикайин шагьрариан ва районариан вуйи командйир ву. Гьацира МВД-йин, оборонайин министерствойин, Росгвардияйин, Урусатдин аьтрафарин хатIасузвал уьбхру Федералин гъуллугънан командйирира иштираквал апIиди. Янаки 500-тIан артухъ спортсменари чемпионатдиъ чпин мумкинвалар улупиди.
Къайд апIуз ккундузузки, 28-пи октябриъ улихь ккимиди вуйи, хъа 29-пи октябриъ финалин талитар ва шадлугъниинди чемпионат ачмиш апIбан серенжем кIули гъягъиди.
Гьацира пуб лазим вуки, гъюру йисан му чемпионат вари Урусатдин дережайиъди Аьли Аьдиевдин ччвурнахъ хъайи спорткомплексдиъ кIули гъабхуз планламиш дапIнача», – гъапну Бейдуллагь Исаевди.
Чемпионат ачмиш апIбан мяракайиъ республикайин улихь-кIулихь хьайидар, Урусатдин Игит Эседуллагь Абачев, Госдумайин депутатар ва хусуси метлеб айидявдин операцияйин ветеранар иштирак хьиди.
