Гюлягьмад Маллялиев
Ктабхъурайи гьяфтайиъ Мягьячгъалайиъ кIули гъубшу шадлугънан ва гизаф маракьлу гьядисайи Дагъустан гизаф бажаранлу ва аьламатнан пишйирин инсанарин макан вуйивал нубатнан ражари тасдикь гъапIну. Думу гьядиса Къарабудагъкент райондин Параул гъулан агьали Сулейман Аьширлаевди уткан хатIниинди кпикIу Кьурандин презентация вуйи.
Китаб якьинди гизаф уткануб ва чан аьхюшниинди мюгьтал апIруб гъабхьну. Дидин гъагъ саки 38 кг ву, хъа кьадар 150х75 см. Думу гьязур апIуз автори заан ерийин кагъаз ишлетмиш гъапIну, дид’ин багьа гъидкьин жилдрар иливну, китабдин кIажарин гъирагъар геометрияйин ва кюкйирин накьишарихъди гъабалгну.
Художник ва каллиграфияйин устад Аьширлаевди мусурмнарин пак китаб гизаф жикъи вахтнан арайиъ – 4 вазлина 19 йигъан кибикIну. Дугъу чав ктибтганси, гьаму вядайи, Аллагьдин марцци гафнахьна вуйи ккунишну чаз туврайи жанлу кьувват гьисс апIури, думу йигъ-йишвди лихури гъахьну. Мирасарихъди, дустарихъди вуйи гюрюшар ярхла вахтназ – ляхин ккудубкIайиз – илдичну, кюлфетдин имбу ляхнарихьанра ярхла гъахьну, фицики варитIан азгар метлеб – хъюгънайи ляхин кIулиз адабгъуб вуди гъабхьну.
«Кьур’андиз бахш гъапIу гьаму вахт йиз уьмриъ варитIан бахтлу дакьикьйир гъахьнийиз. Узу Аллагьдикан, гьаму ляхин ккудубкIайиз, узу чIивиди гъитбан гизаф дюъйир апIури гъахьунза», – ктибтнийи 1000-рихьна инсанар уч духьнайи презентацияйиъ Аьширлаевди.
Дупну ккундуки, му кесп дугъахьна чан абайилан ва адашдиланмина гъафиб ву. Дугъу неинки каллиграфияйин хатIниинди бикIуру, хъа гьацира шиклар зигуру, мистарин айитIишвар каламдин аятариинди албагуру.
Дагъустандиъ гьаму жюрейиинди Кьур’ан кпибикIри, йицIбариинди йисар вуйи. Хъа ухьу тарихдихьна илтIикIиш, кIваин апIуз шулуки, дагълу уьлкейиъ хил’инди Кьур’ан ва жара диндин китабар кидикIбан девлетлу аьдатар ади гъахьну. Мисалназ, имам Шамиль Чичандиан Дагъустандиз удучIвну гъюруган, дугъу саб гьяйвниинди багьалу шей’ар (безегар), йирхьуб гьяфниинди гъизил ва арс ва ургуб гьяйниинди хил’ инди дидикIнайи илмин ва диндин китабар гъахну. Гьаму чан библиотекайихъди имам Шамиль учв Калугайиъ яшамиш шулайиганра жара гъахьундар.
Думу вахтариъ Дагъустандин саки гьарсаб гъулаъ Кьур’ан хилихъди кпикIрудар айи – аьлимар, мутааьлимар, медресйирин кIулиъ айидар.
Гьарсаб мистаъ хил’инди ктикIу китабарин коллекцйир уьрхюри гъахьну – йицIбариинди ва варжариинди китабар. Магьа гьамус думу ужуб ва эдеблу аьдат Сулейман Аьширлаевди давам апIура.
