Гюльнара Мягьямедова
Табасаран райондин администрацияйи хусуси хуларин ва хуларихъ хъайи жилин участокдин эйсивал апIуз ихтияр тувру документар гьязур апIувалин чарасузваликан мялумат тувра.

 

Эгер гьюжат арайиз гъюрубси гъабхьиш, думу документари ичв маракьар уьрхюз, эйсивал апIуз ва хусуси мутму ишлетмиш апIуз ихтияр тувру. Мидланра савайи, ихтияр тувру документар айивали жюрбежюр ихтиярарин ва экономикайин кьатI’и аьлава мумкинвалар тувру. Мисалназ, саб йишв’лан тмуну йишв’ина гъабхуз даршлу мутму гъадабгъуз банкдиан пул бурж апIуз (ипотека), жвуван хусуси наслариз гъибтуз, ясана арендайиз вая масу тувуз, гьюкуматдин программйирикан ва льготйирикан хайир ктабгъуз шулу.

Хъа эгер хуларихъ ва участокдихъ документар хъадарди гъахьиш, читинвалар гизаф арайиз гъюру. Мисалназ гъадабгъиш, эйсивал тувру документар адарш, ватандашдихьан чан хуларихъна газ, электричество зигуз шулдар, фицики къанундиинди ихтияр адар. Гьаци вуйиган, эгер ичв хусуси хуларин документар адарш, вахтниинди дурар гьязур апIинай.

Эйсивалин ихтияр тувру документар гьязур апIувал думукьан рягьят ляхин дар, диди аьгъювалар тIалаб апIура, гьаддиз пишекрарихьна илтIикIувал лазим шулу. Думу ляхин фици дапIну ккундуш, Табасаран райондин тикилишчивалин ва архитектурайин отделин кIулиъ айи Акифин Межидовди ктибтну. Дугъан гафариинди, сифте гъулан поселениейин администрацияйиз илтIикIну, мяишатдин китабдиан жилин участокдиз вуйи выписка адабгъну ккунду. Гьадму ляхин апIбан кьяляхъ кадастровый инженерихьна илтIикIувал лазим шулу. Дугъу Росреестриз тувру документар гъварч апIуз кюмек апIиди. Документар гьязур апIбан кьяляхъ, хуларин ва жилин участокдин эйсивалин ихтияр гьюкуматди регистрация апIбан бадали, аьрза хьади МФЦ-йиз илтIикIну ккунду.