ГЮЛЬНАРА МЯГЬЯМЕДОВА

Урусатдин Игит, Ленинградский военный округдин кьушмарин командующийин заместитель Эседулла Абачевдиз («Адлер» позывной) Урусатдин оборонайин министр Андрей Белоусовди Александр Невскийин гъилинжар хъайи орден тувну. Серенжем генерал-лейтенант Эседулла Абачевдин сагъламвал къайдайиз хурайи госпиталиъ кIули гъубшну.

 

Андрей Белоусовди генерал-лейтенантди гъубху гъуллугъназ чухсагъул гъапнийи ва дугъаз ухди сагъ хьувал ккун гъапIнийи.
Сергей Меликовди чан дуст, ихь ватанагьли заан награда тувбахъди тебрик гъапIну. «Уьлкейин кIулиъ айирин терефнаан гьамциб награда тувували Ватан уьбхбак ва гъалибвал багахь апIбак дагъустанлуйи кивнайи пай субут апIура. Дугъан Ватандиз гъуллугънан рякъ, рюгьнан кьувват, дирбаш’вал, дугъу туву дявдин аьгьтназ вафалувал чахъди женг гъабхурайидариз ва жигьил офицерарин наслариз чешне ву», – гъибикIну республикайин главайи MAX-диъ айи чан машнаъ.

Газатдин редакцияйин коллективди ихь машгьур генерал-лейтенант Эседулла Абачев заан ордендихъди тебрик апIури, дугъаз ухди сагъ духьну, чан пишекарвалин вазифйир тамам апIбахьна гъюб ккун апIура.