Зубайдат Шябанова
Офицерихъди сюгьбат гъубхну
Гьаму йигъари Табасаран райондин глава Мягьямед Къурбанов ва райондин главайин жямяаьтлугъдин хатIасузвал уьбхбан месэлйириз лигру заместитель Ринат Мирзабалаев райондиз жикъи отпускдиз дуфнайи, хусуси метлеб айи дявдин операцияйин иштиракчи Росгвардияйин подполковник Мурад Султановдихъди гюрюшмиш гъахьну.
Мурад Султанов Хючна гъулаъ бабкан гъахьну. Хючна гъулаъ 2-пи нумрайин мектеб ккудубкIбан кьяляхъ думу Владикавказ шагьриъ айи айтIан кьушмарин Кафари Кавказдин военный институтдик урхуз кучIвру. Вуздин диплом гъадабгъур думу уьлкейин жюрбежюр военный гъуллугъариъ контрактдиинди лихури гъахьну. 2023-2024-пи йисари подполковник Султанов Запорожский терефнаъ хусуси метлеб айи дявдин операцияйиъ иштирак гъахьну. Гьамусяаьт дугъу Пензенский областдиъ Росгвардияйиъ гъуллугъ гъабхура.
Сюгьбатнаъ Мурад Султановди чан гъуллугънакан, контрактдин къайдайиинди гъуллугъ гъабхурайидариз айи мумкинваларикан ва военный вузарик урхуз кучIвуз ният айи жигьилари фикир тувну ккуни дюшюшарикан ктибтну.
«Гъи уьлкейин военный гъуллугъариъ хайлин пишекрар гьуркIрадар. Багъри райондин мектебар ккудукIу выпускникариз, военный институтариъ урхуз кучIвуз ният ва кьаст айидариз узу консультация тувуз гьязур вуза. Военный пише гъадабгъбан кьяляхъ му рякъюъди гъягъюз ккуни жигьиларин улихь гележегдиъ хайлин мумкинвалар ачмиш шулу. Дурар ужуб маважиб, яшайишдин цирклиан заминвал ва заан гъуллугъариз удучIвру мумкинвал ва гьацира жарадар ву», – гъапнийи Мурад Султановди.
Мягьямед Къурбановди чан терефнаан Росгвардияйиъ айи ва хусуси метлеб айи дявдин операцияйиъ Ватандин маракьар уьрхюри, саки гьар йигъан женгнаъ гъуллугъ гъабхурайи вари ихь эскрариинди дамагъ апIурайиваликан, гележегдиъра ихь игитарихъди аьлакьа уьбхюз, жюрбежюр терефариан, гьадму гьисабнаан рягьимлувалинра, кюмекар тувуз райондин кIулиъ айидар ва жямяаьт гьязурди вуйиваликан гъапнийи.
Шиклиъ: Мурад Султанов главайихъди сюгьбатнаъ.
Рягьимлувалин кюмек
Дугъриданна, Мурад Султановдихъди вуйи сюгьбатнан кьяляхъ, Табасаран райондиан хусуси метлеб айи дявдин операция гъябгъюрайи йишваз нубатнан рягьимлувалин кюмек хътапIну. Му ражари рягьимлувалин кюмек райондин администрацияйин, культурайин, образованиейин ва райондин жара идарйирин ва карханйирин вакилари, гъуларин агьалйири Луганский Халкьдин республикайиъ айи «Каспий» батальондин эскрариз гьязур гъапIнийи.
Рягьимлувалин кюмек эскра¬рихьна хьади гъушу дестейиъ Табасаран райондин главайин заместитель Ринат Мирзабалаев, райондин депутатарин собраниейин председателин заместитель Яшар Аьбдулов, «Экостарт» МБУ-йин директорин заместитель Мурад Жяфаров, Ягъдигъ гъулан 1-пи ва 2-пи нумрйирин ва Хючна гъулан 2-пи нумрайин мектебарин директорар Уьсман Мягьямедов, Ражаб Аьбдуселимов ва Панах Султанов айи.
Делегацияйин вакилар «Каспий» батальондин эскрарихъди гюрюшмиш гъахьну. Думу эскрарин арайиъ батальондиъ швнуб-саб вазли гъуллугъ гъабхурайи Табасаран райондин главайин заместитель Заур Мусаевра айи. Табасаран райондин главайин ччвурнахъан делегацияйи Ватанди улихь дивнайи метлебар игитвалиинди тамам апIурайи эскрариз Чухсагъулин кагъзар тувну ва райондин жямяаьтдихьан мани саламар гъапну.
Батальондин эскрари рягьимлувалин кюмек уч апIбак пай киву райондин гьарсар касдиз чухсагъул мялум гъапIну.
Шиклиъ: Рягьимлувалин кюмек хьади гъушдарин ва эскрарин десте.
