Зубайдат Шябанова
Гьаму йигъари Табасаран райондин администрацияйиъ райондин глава Мягьямед Къурбанов ва жямяаьтлугъдин хатIасузвал уьбхбан цирклиан главайин заместитель Ринат Мирзабалаев хусуси метлеб айи дявдин операция-йиан отпускдиз дуфнайи эскрарихъди гюрюшмиш гъахьну.
Гюрюшдиз дуфнайи Гьямзат Агъасиев – АхьитI, Къурбан Аьлиев – ХустIил, хъа Тобиос Мирзабегов Сюгют гъулариан вуйи. Шубридра хусуси метлеб айи дявдин операцияйиз чпин хушниинди гъушдар ву, ва гьамусяаьт дурари гьюлин къушмарин десантдинна гьюжум апIру ротайин 1-пи батальондиъ гъуллугъ гъабхура. Шубридизра дявдин женгариъ зийнар гъахьну.
Командованиейи чпин улихь дивнайи метлебар тамам апIбаъ дирбаш’вал ва игитвал улупбаз лигну, Къурбан Аьлиев «Дирбаш’вализ лигну» медаль тувбиинди лишанлу дапIна, хъа Гьямзат Агъасиев ва Тобиос Мирзабегов Кьягьялвалин ордендиз улупна. Отпуск ккудубкIиган, эскрар кьяляхъ хусуси метлеб айи дявдин операцияйиз гъягъюру.
Главайихъди вуйи гюрюшдиъ эскрари фронтдин аьгьвалатнакан, урусатдин эскрарин гьар йигъандин гъайгъушнарикан, хъуркьуваларикан ктибтну.
Мягьямед Къурбановди чан нубатнаъ райондин администрацияйи му женгарин иштиракчйириз ва дурарин хизанариз туврайи кюмекнакан ва жягьтлувалиинди эскрариз кюмек апIуб метлеб ади гьяракатнаъ ипнайи «Ухьу сатIиди вухьа» штабдин ляхникан, учв ва администрацияйин жара гъуллугъчйир хусуси метлеб айи дявдин операция гъябгъюрайи йишвариз рягьимлувалин кюмек хьади фици гъушнуш, гьаддикан ктибтнийи.
Эскрари къайд гъапIганси, Табасаран райондиан СВО-йиз душнайи вари жигьилари райондин главайин терефнаан чпихьна вуйи янашмиш’вал гьаммишан гьисс апIура ва дугъаз баркаллагь кIура. Ва гьаддихъди сабси, дурари Мягьямед Къурбанводикан фронтдиз хътапIурайи рягьимлувалин кюмек вари эскрарихьна рубкьуз рякъяр агувал ккун гъапIну.
«Гьамусяаьт ихь райондиан швнуд-сад агъзур бай хусуси метлеб айи дявдин операцияйин женгариъ иштирак шула. Гьаму аьгьвалатнаъ рягьимлувалин кюмек хьади гъягъруган, думу вари терефариз гъабхуз ва ихь вари эскрарихьна сабси рубкьуз читинди шулу. Хъа учу шлубкьан думу ляхин ккабалгуз ва рягьимлувалин кюмек варидарихьна рубкьуз чалашмиш шулча», – гъапну райондин главайи, эскрариз гележегдиъра кюмек апIрувалин гаф туври.
Дугъу гьацира эскрариз жанлу ватандаш позиция уьбхюрайивализ, лайикьлуди гъуллугъ гъабхурайивализ чухсагъул мялум апIури, хъуркьувалар ва багахь гележегдиъ гъалибвал гъадабгъну, сагъди хулаз гъюб ккун гъапIну.
Эскрарихъди райондиан СВО-йиз медикаментарин ва сабпи нубатнаъди лазим вуйи шей’арин нубатнан рягьимлувалин кюмек хътапIну.
