Мейлан Нежефов
2007-пи йисхъанмина гьар йисан 9-пи декабрь ихь уьлкейиъ Ватандин Игитарин йигъ вуди къайд апIура. Му йигъаз тялукь вуйи серенжемар гъуху шагьрарин ва районарин арайиъ Хив райондира чан хусуси йишв бисура. Саки вари гъулариъ эскрарин ядиграрихъ кюкйир дивбан, игитарин накьвар гъеерццу укIар-кIажарихьан ва кьаларихьан марцц апIбан серенжемар гъухнийи. Хъа Хирижв гъулан мектебдиъ мялимари «Игитарди бабкан шлуб дар. Дурар уьмри арайиз хуру» кIул тувнайи ачухъ дарс кIули гъубхнийи. Дарснаъ баяр-шубари «Вахтну учу ктагъну» темайиан шиърарра гъурхнийи.
Кашкентдин мектебдиъ саки вари Урусатдиъ гъабхурайи «Игитарин тарих» акция кIули гъубшну. Акцияйиъ гьадму гъулан агьали, Афгъан дявдин иштиракчи Марат Балакеримов иштирак гъахьнийи. Мектебдиъ урхурайи баяр-шубариз дугъу, «Ватан» ва «Дада» кIуру кьюб гафну дявдин майдандиъ айи эскрарин уьмриъ фициб роль уйнамиш апIураш, кьатI’иди ктибтнийи.
Зилдикк гъулан советарин кIулиъ айи Аьбдуляким Гьюсейбегов ва гъулан мектебдин «Сарпидарин гьяракат» дестейиз дахил шулайи Мавлид Аьбдулаев хусуси метлеб айи дявдин операцияйиъ баяр талаф гъахьи Гъизил Астархановайихьна, Шихягьмад Яралиевдихьна, гьадму дявдиъ хтул уьмриан гъушу Гюльпери Гьяжимягьямадовайихьна ва гьацира шубур чвена сар хтул дявдиъ айи Гюльпери Гьясановайихьна улукьуз гъушнийи. Чпин сюгьбатариъ гьацдар игит баяр Ватандиз багъиш гъапIу, дурариз гъудубкьу ватанпервервалин тербия туву абйир-бабари гьаруриз жа-жаради чухсагъул мялум гъапIнийи.
Игитарин йигъаз бахш вуйи яркьу серенжем Мажвгларин кьялан мектебдиъра кIули гъубшну, чпихь урхуб ккудубкIну, Урусатдин Яракьлу кьувватари Украинайиъ гъабхурайи хусуси метлеб айи дявдин операцияйиъ гьунарар улупури талаф гъахьи рядовой Равин Гьяжибалаевдин сурат кайи мармардашдин гъван багъри мектебдин цалик кебхнийи. Му ватанпервервалин серенжемдиъ райондин глава Ярмет Ярметов, Хив ва Агъул районарин дявдин комиссар Сулейман Гьюсейнов, райондин культурайин регьбер Казбек Къазиев, Хив ва Агъул районарин Ватан уьбхрударин фонднан социальный координатор Имамудин Агъабаев, гьадму операцияйиан вахтназ вуйи отпускдиз дуфнайи Радик Ибрагьимов, игитрин дада Гъисханум Гьяжибалаева, багъридар, гъуландар, мектебдин гъуллугъчйир ва урхурайидар иштирак гъахьнийи. Чпин улхбариъ дурари Ватан бадали жан туву Равиндин игитваликан аргъаж шулайи наслариз ктибтнийи. Хъа баяр-шубари багъридарин ва гьякимарин юкlв адабгърустар ва чIарди зиз апIрусдар шиърар гъурхнийи. Гьацира мектебдин гьяятдиъ Ватан бадали чпин жанар туву игитарин ччвурнахъ хъайи багъдиъ Равин Гьяжибалаевдин ччвурнахъ кIару беълийин гъелемра ибтнийи.
Пашманвалин мяракайин аьхириъ мармардашдин гъвандин улихь кюкйир дивбан ва гьацира ужудар чагълариъ айи вахтна дявйириъ уьмур кьатI гъабхьи жигьилар фикриъ уьрхюри, саб дакьикьайин арайиъ ккебехъну гъузбан серенжемра гъубхнийи.
Мидланра савайи, мектебдин гьяятдиъ Дагъустанди чпиинди дамагъ апIурайи 17 игитрин суратар кайи баннерар, дурарин уьмрикан гьуркIну мялуматар кайи, баяр-шубари гьязур дапIнайи кьулар, газатар ирхнийи, гъунши гъулан агьали, чпихьра мектебдиъ аьгъювалар гъадагъу Урусатдин Игит, генерал-лейтенант Эседулла Абачевдин ччвурнахъ хъайи партара ачмиш гъапIнийи.
