Зубайдат Шябанова
Гьаму йигъари Табасаран райондин делегация рягьимлувалин кюмек хьади хусуси метлеб айи дявдин операция гъябгъюрайи Запорожский областдиъ айи ихь эскрариин улукьуз гъушну.
Табасарандиан гъушу делегацияйин дахилнаъ, Мягьямед Къурбановдилан гъайри, дугъан заместитель Ринат Мирзабалаев, райондин гюзчивал гъабхбанна гьисабар гъахру органарин председатель Яшар Аьбдулов, райондин КЦСОН-дин кIулиъ айи Тимур Аьлиев, РД-йиъ айи МВД-йин штабдин аьхюну инспектор, айтIан гъуллугънан майор Рафик Керимов, РД-йин минэнергойин гъуллугъчи Ариф Къурбанов айи.
Райондин делегацияйи хьади гъафи рягьимлувалин кюмекнаъ ипIру сурсатар, дармнар, марццишназ, тикилиш’валин ляхнариз лазим вуйи шей’ар ва жара алатар айи. Му ражари рягьимлувалин акция гъабхуз ихь ватанагьли меценат Мягьямедяли Ферзуллаевди кюмек гъапIнийи.
Хялар Михайловский муниципальный округдин глава Вячеслав Беднякди округдин администрацияйиъ къаршуламиш гъапIну. Гьамина Табасаран райондиан вуйи эскраризра дих дапIнайи.
Хусуси метлеб айи дявдин операцияйин иштиракчйири ватандиан дуфнайидариз чпин улихь хьайи месэлйирикан ва далу терефнаъ чпин багахьлуйириз лазим вуйи кюмекнакан ктибтнийи. Дурари рягьимлувалин кюмек хътапIбаз райондин агьайлириз чухсагъул мялум гъапIнийи.
Мягьямед Къурбановди, ватандин хатIасузвал игитвалиинди уьбхюри, эскервалин буржи вафалуди гъабхурайи эскрариз Табасаран райондин главайин ччвурнахъан чухсагъулин кагъзар тувну.
Гьацира Табасаран райондин ва Михайловский округдин главйирин ччвурнахъан чухсагъулин кагъзар хусуси метлеб айи дявдин операцияйиъ иштирак шулайи эскрариз швнуб-саб ражари кюмек гъапIу меценат Мягьямедяли Ферзулаевдизра тувнийи.
Мягьямед Къурбановди ва Вячеслав Беднякди Дагъустанди Михайловский райондиин шефвал гъадабгъбан ва думу цирклиан туврайи кюмекнакан сюгьбат гъапIнийи. Вячеслав Беднякди республикайи чпин округдиз кюмек тувуз хъюгъхъанмина душваъ духьнайи дигиш’валарикан ктибтнийи.
Мягьямед Къурбановди чан нубатнаъ Сергей Меликов кIулиъ ади, Дагъустанди, ватан уьбхюрайи эскрари азад дапIнайи аьтрафариин яшайишдин шараитар къайдайиз хпан цирклиан вари уьлчмйир кьабул апIурайиваликан ва аьхиримжи вахтна Ми-хайловский райондиъ духьнайи гъулайвалар ачухъди рякъюрайиваликан гъапнийи.
«Ихь кьувват ихь сабвалиъ, дуствалин мюгькам аьлакьйириъ ва ихь гъалибвалихъ хъугъувалиъ а», – гъапнийи Вячеслав Беднякди.
КIваин апIуз ккундучуз, цIиб улихьнаси Табасаран райондин делегация хусуси метлеб айи дявдин операцияйин эскрариз рягьимлувалин кюмек хьади Донецкдин терефназра гъушнийи.
