Зубайдат Шябанова

Гьаму йигъари Табасаран райондин глава Мягьямед Къурбановдин табшуругъниинди райондин ГьепIил гъулан Кольцевая кючейин рякъ рас гъапIну.

Улихьнаси ГьепIил гъул’ан вуйи СВО-йин женгариъ кечмиш гъахьи Тимур Аьбдуллаевдин аьхю аба – Аьбдурягьман Аьбдуллаевдихьна Мягьямед Къурбанов худлин Кьягьялвалин орден хьади гъушу вахтна, абайи райондин главайиз чпин кючейин рякъ гъагъи гьялнаъ айиваликан гъапну ва дид’ин асфальт улубзбан тIалаб гъапIну.
Ефрейтор Тимур Аьбдуллаев хусуси метлеб айи операцияйин гъагъи женгариъ гъубшу йисан март вазли кечмиш гъахьнийи. Думу гъулаъ аба-Аьбдурягьманди ва баб-Саяд Аьбдуллаевари уьрхюрайи.

Накь, 1-пи ноябри, Табасаран райондин администрацияйин главайин жямяаьтлугъ хатIасузвал уьбхбан цирклиан вуйи заместитель Ринат Мирзабалаев ва райондин депутатарин Собраниейин председателин заместитель Яшар Аьбдулов рас гъапIу рякъ ахтармиш апIуз ГьепIил гъулаз гъафну.

Кольцевая кюче ямажнак кайиб ву. Гьаддиз аьхю мархьар гъургъиган ва кьюрдун вахтари думу рякъ лапра гъагъи гьялнаъ шулу. Расвалин ляхнар бицIи вахтнан арайиъ кIулиз адагъну. Гьаму йигъари рякъюъ асфальт улубзбан ляхнарра аьхирихъна гъафну.

Ринат Мирзабалаев ва Яшар Аьбдулов Аьбдурягьман Аьбдуллаевдихъди гюрюшмиш гъахьну, рякъюн ерийикан гьерхну ва муниципалитетди дурарин хизандиз гележегдиъра удукьру кюмек тувруваликан гъапну.