Гюльнара Мягьямедова

29-пи августди Мягьячгъалайиъ «Евразияйин сес-2024» милли вещаниейин Вариурусатдин фестиваль ачмиш гъабхьну. Каспий гьюлин гъирагъдихъ ерлемиш дубхьнайи «Джами» комплексди вари уьлкейиан журналистар, этнографар, культурологар, гьюкмин ва жямяаьтлугъ тешкилатарин вакилар кьабул гъапIну.

 

Дагъустандин Главайин, республикайин Правительствойин ва Халкьдин Собраниейин кюмекниинди ВГТРК-йин «Дагъустан» филиали тешкил дапIнайи фестиваль Урусатдин халкьарин девлетлу культурайихъди ва тарихдихъди таниш шлу серенжем гъабхьну.

Фестивали регионари чиб-чпихъди аьлакьйир яркьу апIуз рякъяр ачмиш апIури, Урусатдин художествойин, эдеблувалин ва жямяаьтлугъдин башкъавалар улупиди.

Журналистарихьан, операторарихьан ва режиссерарихьан милли культурйирин тематика ачмиш апIбаъ чпин пишекарвалин аьгъювалар, удукьувалар, мумкинвалар за апIуз хьибди.

Гьаму йисан фестиваль 1999-пи йисан Дагъустандиъ архьу варихалкьарин террористарин дестйир дагъитмиш дапIну 25 йис тамам хьпаз бахш дапIна.

Фестивалин программайиъ телерадиопрограммйирин, фильмарин конкурсар, экскурсйир, «Дагъустан: варихалкьарин террористарин дестйир дагъитмиш дапIну 25 йис. Тарих ва гъийин девир» «гергми стол» а. Фестиваль 1-пи сентябризкьан давам хьибди.