Наргиз Гюлечова

 
4-пи августди Дагъустандин Главайин вазифйир вахтназди тамам апIурайи Федор Щукин бабкан духьну 50 йис тамам гъабхьну.

Федор Вячеславович Щукин 1976-пи йисан 4-пи августди Горьковский областдин Починки кIуру гъулаъ бабкан гъахьну. Дугъан 50 йисандин юбилейихъди аьлакьалу вуйи тебрикар, республикайин улихь-кIулихь хьайидарихьанси, уьлкейин Президент Владимир Путиндихьанра дуфнайи.

 
Владимир Путинди Федор Щукиндиз 50 йисандин юбилейихъди тебрик апIури, дугъан пишекарвалин рякъкан ва агьалйирин ихтиярарна къанундин маракьар уьрхбаъ дугъу тамам гъапIу ляхникан дупнайи.

 
«Дагъустан Республикайин яшайишдинна экономикайин артмиш’валин цирклариъ, мушваъ яшамиш шулайи касарин уьмрин дережайин ери за апIбаъ, республикайин ва Кафари Кавказдин регионарин халкьарин арайиъ ислягьвал уьбхбаъ улихь дивнайи жавабдар вазифйир тамам апIбаъ увуз айи компетеция ва таржуба аьхю кюмек шлувалик умуд кивраза», – дупна президентдихьан вуйи кагъзиъ.

 
Гьацира Федор Щукиндиз му йигъахъди Урусатдин Правительствойин председатель Михаил Мишустиндихьан, РФ-йин Совет Федерацияйин председатель Валентина Матвиенкойихьан, «Саб вуйи Урусат» политический партияйин председатель Дмитрий Медведевдихьан, РФ-йин президентдин Кафари Кавказдиъ гьуркIу ихтиярар айи Юрий Чайкайихьан ва хайлин жара гьюрматлу касарихьан тебрикнан кагъзар гъафнийи.

Гьарурихьан вуйи кагъзиъ дугъан пишекарваликан, инсанваликан улупна ва гьацира дугъаз жандин сагъвал, ляхниъ хъуркьувалар ккун апIура.