Гюльнара Мягьямедова

Октябрин эвелариъ Мягьячгъалайиъ Кафари Кавказдин халкьарин арайиъ вуйи китабарин «Тарки-Тау-2024» фестиваль к1ули гъябгъиди. Думу цци 11-пи ражари гъабхиди.

 

Фестивалин тешкиллувалин комитетдин вакилари му культурайин серенжемдикан 25-пи сентябри гъабхьи пресс-конференцияйиъ журналистариз ктибтнийи.
Фестиваль 4-6-пи октябри Мягьячгъалайиъ СтIал Сулеймандин ччвурнахъ хъайи паркдиъ тешкил апIбанди ву. Дидин дахилнаъди Мягьячгъалайиз машгьур урус писателар, актерар, литературоведар, художникар ва музыкантар гъиди. Паркдиъ китабарин презентацйир, выставкйир, мастер-классар, гергми столар гъахбан бадали, майднар тешкил апIиди.

Гьаму йисан «Тарки-Тау» фестивалиъ асас фикир бицIидариз вуйи программайиз тувди. БицIидарин улихьна интерактивный тамшйир, шиклар зигувалиан ва пластилиндикан жюрбежюр алатар апIбаан конкурсар адагъиди, писателарихъди гюрюшар тешкил апIиди.
«Тарки-Тау» фестиваликан китабариин юкIв алидарин гюрюшар кIули гъягъру, кьабул гъахьи китабар масу гъадагъуз шлу, авторарихъди таниш хьуз мумкинвал тувру, хушди вахт адапIуз шлу йишв апIбанди вуча», – гъапну «Дагъустан» журналин кIулин редактор ва фестивалин тешкилатчи Марат Гьяжиевди.

КIваина хурача, Мягьячгъалайиъ «Тарки-Тау» фестиваль 2012-пи йисхъанмина гьар йисан гъабхура. 2024-пи йисан думу фестивалиъ Урусатдин жюрбежюр регионариан, Кьибла Осетияйиан, Турцияйиан ва Ирандиан 60-рилан зиина китабар чап апIру ва китабар масу тувру тешкилатар иштирак хьиди.

Фестиваль Дагъустан Республикайин мялуматарин ва чап апIбарин агентствойин кюмекниинди художествойинна публицистикайин «Да-гъустан» журнали тешкил дапIна.