Наргиз Гюлечова

8-пи сентябриан 11-пи сентябриз Каспийск шагьрин «Анжи Арена» стадиондин аьтрафариин «Пас на Каспий» ччвур тувнайи Вариурусатдин футболин турнир кIули гъябгъюра. Му турнир асас вуди 2016-пи йисан бабакан гъахьи бицIидарин арайиъ гъабхиди.

 

Спортдин талитарин тешкилатчи Расул Аьгьмедхановди туву мялумматариинди му турнир рягьимлувалин проект TOOBA-йихъди сатIиди тешкил апIури цци 7-пи йис ву. Ццийи турнириз, саб Урусатдиан ваъ, хъа харижи уьлкйирианра командйир гъюб мумкин ву.

«Урусатдин регионарин кIакIначи футболин академйириан, ухьухьна бицIи футболистар дуфна. Дурари чпин му турнирихьна маракьлувал айиб улупура. Гьацира учу Турцияйин футболин академйирихъдира гаф-чIал гъабхурача.

Талитариз гъюрайи иштиракчйир анжагъ саб футбол апIуз кIури гъюрайидар дар. Дурариз ихь республикара рябкъюз ккунда. 4 йигъандин арайиъ талитар духну, финализ удучIвру командйир, футболин аьдатниинди, майдандиина кIул’ин дагъустандин пIапIхар алди удучIвиди.
Сабсана пуз ккундузуз, гъюру йисан хьадукран вазари турнириъ иштирак хьуз шубарин командйиризра дих апIуз планариъ айич. Фицики гъи, жара регионариъси, ухьузра футболиан шубарин ужудар командйир ахьуз ва дурари дурумлу хъуркьувалар улупура», – гъапну «Пас на Каспий» проектдин кIулиъ айи Расул Аьгьмедхановди.

11-пи сентябри хябяхъган сяаьт 8-ди финал кIули гъябгъиди ва гъалибчйирси, иштиракчйирра пешкешариинди лишанлу апIиди.