Зубайдат Шябанова

Табасаран райондин Дарвагъ гъулан библиотекайиъ 5-пи майди Ватандин Аьхю дявдин Гъалибвалин 79 йис хьпаз тялукь вуди, «Гьациб пише а – Ватан уьбхюб» ччвур тувнайи серенжем кIули гъубшну.

 

Серенжемдиъ Дарвагъ гъулан глава Айдин Къурбанов, СВО-йин иштиракчи Аташ Мягьрамов, эскрар-интернационалистар Сардар Къурбанов ва Тельман Уружев, гъулан администрацияйин ва культурайин хулан вакилар, Дарвагъ гъулан 1-пи мектебдиъ урхурайи баяр-шубар ва гъуландар иштирак гъахьну.
Гъулан библиотекайин заведующий Гюлейбат Мягьярамовайи мажлис ачмиш апIбан кьяляхъ, гъулан мектебдиъ тарихдин дарсар кивру мялим Нурлан Исмяиловди Ватандин Аьхю дявдин тарихи гьядисйирикан, фактарикан, игит ватанагьлийирикан гьунарарикан ктибтну.

СВО-йин иштиракчи Аташ Мягьярамовди, хусуси метлеб айи операцияйин важиблуваликан, Ватан бадали чпин жанар гьяйиф дарапIрайи ихь эскрарин игитваликан ва дирбаш’валикан ктибтури, гьадушваъ гьарсар эскриз багахьлуйирин, гъуландарин терефнаан кюмек чарасуз лазим вуйиваликан гъапну.
Къайд дапIну ккундуки, Аташ Мягьярамовди «Земский мялим» программайиинди Дарвагъ гъулан мектебдиъ математикайин дарсар киври гъахьнийи. 2023-пи йисан думу чан хушниинди хусуси метлеб айи дявдин операцияйиъ иштирак хьуз гъушну. Дугъу Херсонский областдиъ инженераринна саперарин батальондиъ гъуллугъ гъабхура. Гьаму вахтнан арайиъ Аташ Мягьрамовдиз кьюб ражари зийнар гъахьну. Серенжемдин аьхириъ мектебдиъ урхурайидари дявдин темайиан шиърар гъурхну ва дявдин иштиракчйирикан чпи гьязур дапIнайи докладарихъди уч духьнайидар таниш гъапIну.