Зубайдат Шябанова
Декабрин эвелариъ Санкт-Петербург шагьриъ маиф бицIидарин «Коляскйирин бал» кIули гъубшну. Жара серенжемарик тевган, дидин фаркьвал гьаддиъ аки, думу машквран асас иштиракчйир коляскйириъ айи майиф бицIидар ва жигьилар ву. «Коляскйирин бал» проект Урусатдин варитIан ужудар 111 проектдин гьисабнаъ айиб ву. Думу юрутмиш апIурайир ихь ватанагьли, Санкт-Петербургдин музыкальный терапияйин ва сагъ апIру искусствйирин «Аревик» тешкилатдин гъуллугъчи Эльвира Асланова ву.
Ич сюгьбатнаъ Эльвира Аслановайи ктибтганси, му машквар дурари гъагъи уьзрариан иццурайи бицIидариз тешкил апIурайиб ву. Йислан-йисаз серенжемди, жюрбежюр яшарин ва пишекарвалин вакилар сатIи апIури, инсандин сагъвал фициб гьялнаъ ашра, искусство варидарихьна рубкьрувал улупура.
«Ич проект хайлин йисари РФ-дин культурайин министерствойин календарин пландиъ улупнайи асас серенжемарик кабхъри гъабхьну. 2014-пи йисхъанмина 2024-пи йисаз Санкт-Петербург шагьрин правительствойи проект тешкил апIуз кюмек туври гъахьнийи. Цци шагьрин правительствойи туврайи субсидйир вари тешкилатариз гьуркIри адрувализ лигну, рягьимлувалин фондарихьна илтIикIунча. Серенжемдиъ гьар йисан 1000-рихьна инсанар иштирак шула. Дурарин гьисабнаъ 200-тIан артухъ гъагъи уьзрариан иццурайи бицIидар, живанар, дурарин абйир-бабар ва хизанарин вакилар а.
2020-пи йисан маиф бицIидариз тешкил апIурайи машквран проект гьар йисан гъабхру «Йисандин гьядиса» милли проектдин лауреат гъабхьну, хъа 2023-пи йисан учу Милли ва пишекарвалин сабпи премияйин конкурсдин «НКО-йиъ йиз рякъ» номинацияйиъ гъалиб гъахьунчу. Гьацира РФ-дин ва Санкт-Петербургдин правительствйирихьан хайлин пешкешар ва чухсагъулин кагъзар гъафунчуз.
Гьаму йисанра учу бицIидариз ва живанариз вуйи машквар заан дережайиъди гъабхуз вари рякъяр ва мумкинвалар гъагунча. Душваъ лицуз даршлу ва жара гъагъи уьзрар кайи 100-дихьна бицIидар ва дурарин абйир-бабар иштирак гъахьну. Узу гьарсар бицIирихъди, дадайихъди, хизанарихъди таниш вуза. Иццру велед айивал гьарсаб хизандиз ккудудубкIру дерд ву. Узу шубур веледдин дада вуза, ва бицIидар жарадариндар вуди шлуб дар, кIуру гафар гьякьлудар вуйибдин инанмиш гъахьунзу.
Гьарсар иццру бицIирин уьзур жвуванубси гьисс апIури, вари дадйирин гъавриъ аза. Узу гележегдиъра думу бицIидариз ва дадйириз кюмек апIуз гьязур вуза…
Асас вуди учу лицуз даршлу, шагьриз гъахуз мумкинвал адру, чпин ахинтIан гъайри сарун фукIара дярябкърайи бицIидариз теклиф апIурача. Бязидарин яшар 25 йистIан артухъ вушра, учу дурариз бицIидар кIурача. Фицики дурарихьна, дугъриданра, бицIидарихьнасиб мани рафтар дубхьну ккунду», – гъапнийи Эльвира Аслановайи ич сюгьбатнаъ.
Цци «Коляскйирин бал» серенжемдиъ Мягьячгъала шагьриан вуйи Аслан Атаевра иштирак гъахьну. Балин дада Аидайин гафариинди, му жюрейин серенжемдиъ дурар иштирак шули сабпи раж ву.
«Коляскйирин бал» серенжемдикан учуз Санкт-Петербургдиз реабилитацияйиз гъафиган гъеебхьунчуз. Узу интернетдиан думу серенжемдикан вари мялуматар гъадагъну, ду-шваъ иштирак хьуз аьрза тувунза. Пуз ккундузуз, зализ гъюрайи гьарсар иццру бицIирихьна вуйи гьюрмат дишла гьисс шуйи. Мушваъ дабалгнайи столар, волонтерарин рафтар, музыкальный пай – вари заан дережайиъди тешкил дапIнайи.
Йиз Асландин 26 йис ву. Учу мициб серенжемдиъ сабпи ражари иштирак шулача. Сифте, учу дуфну имиди, йиз бай гучI кадиси варидарихьинди мюгьтал духьну лигури гъахьнийи. Мукьан гизаф майиф бицIидар саб йишв’ин уч духьнайи серенжем, дугъазси, узузра гъябкъюб дайзуз. Вари зал коляскйириъ айи бицIидари ва жигьилари абцIнайи. Серенжемдиъ улихьна йисари иштирак гъахьидарра гизаф айи. Дурар имбударигъян чпин хулаъ айиганси нач-гучI адрувалиинди аьгъю шуйи. Яваш-явашди имбударин гъалабулугъвалра ктубчIву. Серенжемдин аьхирихъна йиз бализ хулаз гъягъюз зат ккунди имдайи. Учу душваъ саки мярака алдабгъайиз гъузунча.
Эльвира Асланова кIулиъ ади вари волонтерариз ва Суворовдин училищейин курсантариз чухсагъул. Дурари йиз бализ ва жара иццру бицIидариз гьадрахру шадвал багъиш гъапIну. Думу машквраъ гъюру йисанра иштирак хьуз планарик кайич», – гъапну Аида Атаевайи.
