Наргиз Гюлечова
1-пи декабри Мягьячгъалайин гъвалахъ хъайи Новолак райондин аьтрафариин «Росатом» корпорацияйи диврайи Новолакдин микIлахъди либхру варитIан аьхю электростанцияйин (ВЭС) сабпи пай ляхник кипну.
Къайд дапIну ккундуки, 2022-пи йисан Санкт-Петербургдин экономический форумдиъ Дагъустандин кIулиъ айидари гьаму ВЭС дивбан гьякьнаан «Росатом» корпорацияйихъди йикьрар гъийитIнийи. Гьаддихъан проектдин документар гьязур апIури саки 2 йискьан гъабхьну, ва сач ноябрин вазли 300 мегаватт кьувват айи электростанция дивбан бадали шибритI ипнийи. Магьа сад йисандин арайиъ электростанцияйин аьхюнубсиб пай ляхнар тамам дапIну ккудукIну, ва электроэнергия ляхник кипуз микIлахъди илтIикIру 150 метр ягълишин али, 51 метрин ярхи цIабрар али ва гьарсабдиъ саки 8 тоннайихьнакьан гъагъ айи 61 алатди ляхин апIуз хъюгъну. Думу алатари гьясил апIурайи 152,5 мегаватт кьувват электроэнергия Урусатдин сабвуйи гъурулушдиз хъдапIуз хъюгъну.
Новолакдин микIлахъди либхру электростанцияйин сабпи пай ачмиш апIбан серенжемдиз дуфнайи «Росатом Возобновляемая энергия» АО-йин генеральный директор Григорий Назаровди мялум гъапIганси, гъюру йисан 3 вазлин арайиъ имбуну 147,5 мегаватт кьувватнан электроэнергия гьясил апIру 59 микIлахъди илтIикIру алатарра ляхник кирчбан кьяляхъ, Новолакдин ВЭС Урусатдиъ варитIан аьхю миклахъди либхру электростанция хьибди.
Вари ляхнар ккудукIбан кьяляхъ, мартдин-апрелин вазари му ВЭС ачмиш апIуз планариъ а.
Му ВЭС-диин диврайи микIлахъди илтIикIру 120 алатди йисандин арайиъ тартиб апIру электроэнергияйин кьадар 879 млн кВт.ч хьибди ва 240 агъзур хулар акварихъди тямин апIиди.
– «Росатом» корпорацияйин Новолакдин ВЭС гьаму деврин тIалабариз жаваб туврайи, табиаьтдин марццишназ зарар тутрувру энергетикайин объект ву. Гъи, гьаму электростанция ачмиш апIурайи йигъан, корпорацияйин чанра 18 йис шула.
Региондин убгрубдинна энергетикайин къурулушдиз ва агьалйирин яшайишдиз му объектди аьхю кюмек апIбиинра умудлу вуза.
Дагъустандин улихь-кIулихь хьайидариз ва республикайин энергетикайин министерствойиз проект уьмриз кечирмиш апIбаз кюмек тувбаз чухсагъул кIураза», – гъапну Григорий Назаровди.
Аьхиримжи йисари ихь уьлкейиъ микIлахъди лихру электростанцйирин кьадар артухъ шула. Григорий Назаровди туву мялуматарииди, энергетика цIийи алапIбан программайиз гьюкуматдин терефнаан вуйи кюмекниинди, «Росатомди» жара регионариъра микIлахъди лихру электростанцйир ачмиш дапIна. Мисал вуди гъадабгъиш, 2021-пи йисан Ставропольский крайиъ 210 мегаватт кьувват айи Кочубеевский ВЭС ляхник кипну. Гъийин йигъаз, Новолакский ВЭС ктарди, думу варитIан кьувватлу ВЭС ву.
Гьацира «Росатомди» Ростовский областдиъ 90 ва 100 мегаватт кьувватнан 2 ВЭС, Адыгея Республикайиъ 150 мегаватт кьувват айи, Калмыкия Республикайиъ 100 мегаватт кьувват айи, Курганский областдиъ 50 мегаватт кьувват айи ва хъана жара регионариъра ВЭС-ар дивна.
