Мейлан Нежефов

Ухьуз рябкъюрайиганси, гъи саб хайлин гъулариъ учIруди дийигънайи штун, рякъюн, акварин ва зирзибилин месэлйир гъуларин агьал-йири чпин кIул’инди гьял апIуз чарйир агура.

Гьаци, Хив райондин ВертIил гъулан агьалйирин гаф ва метлеб саб вуйивалиан гъулаз гъюрайи убхъру штун месэла гьял гъабхьну. Дидкан мялумат райондин собраниейин депутат, гьадму гъулан агьали Айдемир Мягьямедялиевди тувра.

«Гъулан варитIан ягъли «КIултIин» кIуру йишв’ин ерлешмиш дубхьнайи штун кIул албагувалик, гьадму шид бисурайи 16 тонн гъябгъру цистернайик ва дилин гъулазди гъюрайи турбйирик нукьсанвалар гизаф кайи. Узу улихь гьучIвну, дурар гьюдюхюз гъуландарин мясляаьт гъабхьнийич. Хилар хъержвну, гьарури саб, сари кьюб дапIну, гьавйир  бегьемди кьюрдухьна илтIикIайиз му месэла гьял дапIну ккудубкIунча. Янаки, cифте штун кIул марцц дапIну, душв’ин али гьар-кюл ултIубкъну, цистерна кIуруш, айтIанмина кьархьан ва гьацира мершвлихьан рукьан щеткайихъди марцц дапIну, заълан шир гъивунча, хъасин дидихьна ва дидхьан шлангарихьна шид деебтурайи кранар дигиш гъапIунча ва гъулазди гъюрайи 700 метр шланг кIан’ан-кIулиз гьюдюхюнча.

Къайд апIуз ккундузузки, му ляхниз гьич саб йишвланра кюмек гъабхьундарчуз. Пулин дакьатарин ва имбу ляхнарин
гъайгъу гъизигдарра анжагъ ич учу, гъулан агьалйир, вуча. Ляхнихьна жалб гъахьи гъуландариз аьхю чухсагъул!
Учу штун гъайгъушнаъ амиди, райондин ва гъулан администрацйирин терефнаан Ургъа гъул’ан учухьна гъюрайи рякъра уликкна гъабхнийи. Мидланра савайи, дурари гьацира табиаьтди учуз тувнайи дагрин марццишнан ляхнар кIули гъухнийи.

Гьяйифки, деебтнайи варж агъзурихъ вари ляхнар тамам апIуз дакьатар гьуркIундар. Умуд кивраза, думу дагар
уликкна хпан ляхин лазим вуйи къайдайиинди хьадукра кIулиз адабгъур пну. Эгер гьаци гъабхьиш, райондиз
гъюрайи туристарин маршрутдиъ сабсан уткан йишв артухъ хьибди.

Магьа, агьалйиринра, гьякимаринра гъуларин учIру месэлйир гьял апIуз мурадметлеб саб гъабхьиган,арайиз хайирлу ляхнар хуз сабдира манигъвал тувундар», – гъапнийи Айдемир Мягьямедялиевди.