Зубайдат Шябанова
Гьаму йигъари Табасаран райондин Хючна гъулаъ хусуси метлеб айи дявдин операцияйиъ гъийиху эскрар кIваин уьрхюри, дурарин гьюрматназ бахш дапIнайи зикир кIули гъубшну.
Думу Табасаран райондин администрацияйин иштираквал ади, райондин «Бабарин кьувват» жямяаьтлугъ тешкилатдин кIулиъ айи Армине Аьдбуризаевайи тешкил гъапIну. Ич сюгьбатнаъ дугъу къайд гъапIганси, гьаму серенжем хусуси метлеб айи дявдин операцияйиъ кечмиш гъахьи саки вари эскрарин бабари ва хизанари аьхю аьшкьниинди кьабул гъапIну.
Армине Аьбдуризаевайин регьберваликкди Табасаран райондиъ 91 дишагьли гьисабнаъ айи тешкилат арайиз дубхна. Дурар вари хусуси метлеб айи дявдин операцияйиъ гъийиху ихь игитарин ачIни хпар ва дадйир ву. Думу тешкилат гьадму хизанариз кюмек тувбан, дурарин месэлйир гьял апIбан бадали арайиз гъабхиб вуйи.
«Гьяйифки, райондиъ, шагьрарин мистариъси, дишагьлийириз гъудган апIру йишвар жара дапIну адрувализ дилигну, учу зикир «Табасаран» кIуру кафейиъ гъабхуз мажбур гъахьунча. Серенжемдиъ 45 дишагьлийихьантIан иштирак хьуз гъабхьундар.
Зикир гъабхуз планламиш дапIнайиваликан учу Табасаран райондин кIулиъ айи Мягьямед Къурбановдиз мялумат тувубси, дугъу му теклиф кьабул гъапIну ва мажлис тешкил апIуз чан терефнаанра кюмек тувну. Дугъаз вари бабарин терефнаан чухсагъул кIурача.
Зикир гъабхру йигъан кафейин столар гьадагъну, думу йишв халачйир ккирчну, аьдати табасаран хулаз илтIибкIунча. Зикриз швнур-сар жилиризра гъюз ккун гъабхьну. Дурар жаради вуйи хулаъ дитунча. Узу уч духьнайи дишагьлийириз гьар 2-3 вазлик Табасарандин гъийиху эскрарин гьюрматназ зикир гъабхбан теклиф дивнийза. Вари рази гъахьнийи. Зикир гъурхурра гьаму улихьнаси Уьмрайиан дуфну айи, хусуси метлеб айи дявдин операцияйиъ кечмиш гъахьи эскрин дада, ГьепIил гъул’ан вуйи Къизбан Мягьямедова ву. Гъит ич дюъ-йир Аллагьди вари кьабул апIри.
Узуз «Табасарандин нурар» газатдин машариан ва сайтдиан ихь эскрар улубкьурайи Ватан уьбхрударин йигъахъди тебрик апIуз ккундузуз. Ватанди ичв улихь гъи лап жавабдар месэлйир дивна. Учву дурар нумуналуди гьял апIурачва. Учв’ин гьарсариин жа-жаради ихь ватан дамагълу ву. Аргъаж шулайи насли учвхъан вафалувалин ва ватанпервервалин дарс гъадабгъура. Аллагьди учву наан ашра сагъ-саламатди уьрхри. Багахь гележегдиъ дяви ккудубкIну вари кьяляхъ ичв хизанариз хътакру йигъ улубкьри. Учу зигурайи дерд, хажалат сар бабура гьисс дарапIри. Думу лап учIру, аьгь апIуз даршлу дерд ву. Хъа учвура ич веледар вучва. Баркалла, учвуз», – гъапнийи Армине Аьбдуризаевайи.
Серенжемдиъ зикир урхбан кьяляхъ гъийиху эскрарин гьюрматназ вуйи китабдиз материал уч апIуваликан ва жара месэлйирикан гъулхну. Армине Аьбдуризаевайи къайд гъапIганси, гьаму йисан Сулейман Керимовдин ччвурнахъан хусуси метлеб айи дявдин операцияйиъ гъийиху эскрарин дадйириз ва ачIни хпариз 200 путевка жара апIиди. Табасаран райондиан 32 кас кайи сиягь тартиб дапIна. Дурариз варидариз гьяждиз пулсузди путевка тувди.
