Гюльнара Мягьямедова
Майдин 6-пи йигъан Каспийск шагьриъ Дагъустан Республикайин Главайин тешкиллувалиинди гъабхурайи республикайин «Гъалибвалин пайдагъ» акция ачмиш апIбан серенжем кIули гъубшну.
Серенжемдин иштиракчйир улубкьурайи Гъалибвалин йигъахъди РД-йин премьер-министр Аьбдулмуслим Аьбдулмуслимовди тебрик гъапIнийи. «Саки 80 йис улихьнаси, гъира Гъалибвалин йигъ ихь эскрарин тереф уьбхюри, дурарик игитвалин рюгь капIритIан багахь апIуз хьибдар. Ватандин Аьхю дявдин игитарихьна вуйи гьюрмат цIийи миллетчйириз аькси вуйи кьувватлу яракь ву. Гъит, гъалибвал гъабхи Уьру Пайдгъи Ватан уьбхюрайи таза насларик хъана артухъ гьевес капIри», – гъапнийи чан улхбаъ Аьбдулмуслимовди.
«Гъалибвалин пайдагъ» акцияйин иштиракчйирихьна Дагъустандин Глава Сергей Меликовдин илтIикIбан кагъаз Марат Тимохинди гъурхнийи. «Гъалибвалин пайдагъ» хъана улихь хьа. Урусатдин пайдгъихъди сабси думу пайдагъ Донбасс миллетчйирихьан азад апIурайи Урусатдин эскрарихь хьа. Чпин хушниинди СВО-йиз гъушдарин «Каспий» батальондиъ Берлин ликариккан гъапIу, Рейхстагдиин уьру пайдагъ дубсу, Евгений Халдейин шиклиъ айи эскер – машгьур вуйи Аьбдулгьяким Исмяиловдин хтулра а», – къайд дапIна Сергей Меликовдин тебрикнан адреснаъ.
Серенжемдин аьхириъ Каспийск шагьрин аьхю майдандиин Дюн’яйин кьюбпи дявдиъ Советарин Союзди миллетчи Германияйиин гъалибвал гъадабгъбан лишан Урусатдин гьюкуматдин ядигар (реликвия) –Гъалибвалин пайдагъ гьатIабццнийи.
КIваина хурача, Гъалибвалин пайдагъ 1945-пи йисан 1-пи майди Берлиндиъ Рейхстагдин дараматдиин дубсуб Кутузовдин 2-пи дережайин ордендин Идрицкий 150-пи стрелковый дивизияйин пайдагъ ву.
Гьаму йисан акция цIийи дережайиъди кIули гъябгъюра – СКФО-йин регионариъра гъабхура. Думу регионариъра Гъалибвалин пайдагъ гьатIабццбанди ву.
***
9-пи Майди къайд апIру Гъалибвалин машкврахъди аьлакьалу вуди Дагъустандиъ «Эскрин дада» проект кьувватнаъ убчIвна. Думу проект «Гъалибвалин пайдагъ» акцияйин важиблу пай ву. Республикайин муниципалитетарин кючйириъ ва майднариъ керхнайи СВО-йин иштиракчйирин дадйирин шиклар кайи баннерари инсанарин кIвак гьевес капIру. Баннерарик кайи хусуси метлеб айи дявдин операцияйин иштиракчйирин ва дурарин дадйирин ччвурари гьадму дишагьлийирихьна ва дурарин баярихьна вуйи гьюрмат улупура.
Магьа гьадму банерарикан саб.
***
8-пи майди Дагъустандин Огни шагьриъ СВО-йиъ игитарси гъийиху Огнийин агьалйириз бахш дапIнайи КIваинди уьбхбан багъ ачмиш апIиди. Думу багъ Культурайин ва рягьятвал гъадабгъбан паркдин кьибла терефнаъ ерлемиш дубхьна. Багъдиъ кIваинди гъузбан тахта кайи гъван дивна ва йимишдин гьарар кивна.
***
Хив райондиъ «Георгиевская лента» акция гъябгъюра. Райондин Сарпидарин гьяракатнан вакилари гъулариъ, жямяаьтлугъ йишвариъ агьалйириз тялукь муфтлар пай апIиди. Кьюб рангнакан ибарат вуйи гьюрматлу лишан Гъалибвалин йигъхьан жара апIуз даршлу пай дубхьна.
«Георгиевская лента» сабпи акция 2005-пи йисан Гъалибвалин 60 йис тамам хьпаз бахш вуди кIули гъубшнийи. Акцияйин тешкилатчйир РИА «Новости» ва «Студенческая община» Урусатдин жигьиларин жямяаьтлугъ тешкилат вуйи. Дурари швнубна саб насил сатIи апIру лишан вуди георгиевский муфтул ктабгънийи. Гьаддихъанмина «Йиз кIваин илмийиз. Узу дамагъ апIураза» гафариккди акция гьар йисан гъябгъюра.
