Наргиз Гюлечова
Гъулан мяишатдин цирклари артмиш’вал, гьясил апIурайи сурсатарин ери ва уьмуми натижйир за апIбан бадали, гъи илимдин хъуркьувалар жанлуди ишлетмиш апIура. Дагъустандиъ, мисалназ, йислан-йисаз малдарвалин циркил улихьна гъабхуз цIийи жинсар арайиз хпан бадали, республикайиъ айи Гъулан мяишатдин илмарин федералин центрин (ФАНЦ) гъуллугъчйири аьхю зегьмет зигура.
Улихьна йигъари Дагъустан Республикайин гъулан мяишатдин цирклариъ аьлимарин цIийи ахтармишарин натижйирихъди таниш хьпан бадали, региондин Правительствойин председатель Аьбдулмуслим Аьбдулмуслимов вахтназ вуди ФАНЦ-дин кIулиъ айирин вазифйир тамам апIурайи Нариман Ниматуллаевдихъди ва центрин малдарвалин отделин заведующий Аьбдусалам Хожоковдихъди гюрюшмиш гъахну.
Къайд апIуб лазим вуки, аьхиримжи йисари Дагъустандин гъулан мяишатдин илимдрари тумраз кIури гъитнайи жинснан гьяйвнаринна гамшарин ва аьхю маларин мянфяаьтлувал ахтармиш апIури, хайлин ляхин кIули дубхна. Гьамусяаьт Урусатдиъ варитIан гизаф гамшар айи регион Дагъустан ву. Дагъустандин Правительствойин председателин табшуругъниинди, республикайиъ жинснан гамшарин циркил яркьу апIуз хъюгъра. Му терефнаан илимдари апIурайи ляхнин гьякьнаан гьерхри, узу Нариман Ниматуллаевдихьна илтIикIунза. Дугъу «Табасарандин нурар» газатдиз туву мялуматариинди, гьамусяаьт республикайиъ 20 агъзур кIул гамшар а. Асас вуди дурар хусуси мяишатариъ уьрхюра.
«Дагъустандиъ гамшарин варитIан аьхю мяишат Бабаюрт райондиъ а. ИпIрубдин гьякьнаан кIуруш, му гьяйванатари, чпиз фу тувишра ипIуру, ва дурар уьрхюб хайирлу ву, гьаз гъапиш гамшариз тувру ипIрубтIан, аьдати малариз тувру ипIрубдихъ швнуб-саб ражари кьимат артухъди удубчIвура.
Мидланра гъайри, сагъламвалин гьякьнаан кIуруш, гамшар малартIан цIибди иццру шлу гьяйванатар ву. Дурарин йиккун кьиматра исди ву, аммаки гамшарин никк, казеин кадрувализ лигну, аллергия айи касариз мянфяаьтлуб ву.
Ихь уьлкейиъ гамашарин жинсарикан айиб анжагъ саб Кавказдин гамшарин жинстIан дар. Хъа сарун жара жинс аш вая адарш, ахтармишра дапIнадар», – кIура Нариман Ниматуллаевди.
Ич сюгьбатнаъ ФАНЦ-дин кIулиъ айири мялум гъапIганси, республикайин гъулан мяишатдин илимдин вакилари гамшарин жара жинсар аш ахтармиш апIру методика гьязур дапIну, Урусатдин гъулан мяишатдин министерствойиз гьапIна.
Нариман Ниматуллаевдин гафариинди, гъийин йигъан му цирклиз фикир туврайивализ лигну, гамшарин лижар яркьу апIуб ва цIийи жинсар арайиз хуб метлеб ади, илимдин вакилариз му терефнаан тялукь ляхин кIули гъабхуз ккунди а.
