Мейлан Нежефов

Хив райондин гъуларин мектебар, культурайин хулар ва бицIидарин багъар Гъалибвалин машквар гъабхбаъ жанлуди иштирак шула. 6-пи майдилан ккебгъну, гьар гъулаъ гъалибвалин машквраз тялукь вуйи серенжемар кIули гъахура. Улихьна йигъари вари райондин субботник гъабхьнийи. Гъуларин кючйир, багарихь ерлешмиш духьнайи булагъар чIюрхярихьан ва чIуру укIарихьан марцц гъапIнийи. Мидланра савайи, Ватандин Аьхю дявдин ирс уьбхюрайи ядиграр, дурариз гьякар ва ширар йивну, улариккна гъахнийи.
6-пи майдилан 8-пи майдиз шиклар зигбан, кIваъланди шиърар урхбан, сочиненйир дикIбан, цалин газатар каъбан, мухрик георгиевский муфтлар китIбан, «Гъалибвалин унчIвар» гьязур апIбан акцйир ва конкурсар кIули гъахура.

Асас серенжемар 9-пи майди кIули гъягъиди. Думуган райондин агьалйир, гьадму гьисабнаан аргъаж шулайи насларра, Ватандин Аьхю дявдин, Чечендин ва Афгъанистандин дявйирин гьяракатарин ва Украинайин жилариин гъабхурайи хусуси метлеб айи дявдин операцияйиъ талаф гъахьи эскрарин шиклар хьади Хив гъулан Гъалибвалин паркнаъ «Аьжалсуз полкнан» гъягъювали иштирак хьиди.

Гъит гьарган гъалибвал ихьуб ибшри ва гъурабатдиъ айи ихь баяр саламат ишри!