Мейлан Нежефов
Ухьуз мялум вуйиганси, Дагъустандиъ сумчIурилан зиина чIалар апIру халкьар яшамиш шула. Гьарсаб миллетдин арайиъ чпин аьдатар, культура, фольклор халкьдин арайиан дубгуз гъидритбак ва дурар артмиш апIбак хусуси пай киврайи ватанпервервалин хатI ва гьиссар гъянаъ дидиснайи игитар а.
Гъийин йиз макьалайин игит Зарема Шагьсиновара гьацдарикан сар ву.
Зарема Таригъулиевна 1966-пи йисан июндин 28-пи йигъан ГъуштIил гъулаъ гьюрматлу ва баркаллу Шагьсиноварин хизандиъ бабкан гъахьну. 1983-пи йисан Хиварин гъулан кьялан мектеб ккудубкIбалан кьяляхъ думу Дагъустандин гъулан мяишатдин институтдин экономический факультетдик урхуз кучIвру. 1988-пи йисан, урхуб ккудубкIубси, Зарема Шахсинова тап 1998-пи йисазкьан «Хив» КПО-йин бухгалтерин сарпи заместителди лихуру. Хъа 1999-2011-пи йисари райондин жигьиларин политикайин ва туризмйин комитетдин председателди гъилихнийи. 2011-пи йислан 2019-пи йис’ина гъяйизкьан дугъу культурайин, спортдин, жигьиларин политикайин ва туризмдин отделин начальникди ляхин апIури гъахьну. Хъасин гьаму отделин кIулиъ айирин сарпи заместителди ва гьамус, туризмдин ляхнариз лигру пишекарди лихура.
Вари гьаму йисари дугъу ихь халкьдин тарихнан ва фольклорин ирс уьбхюри, халкьдин арайиан аьдатарин шил дудрубгуз чарйир агура: гьам конкурсар тешкил апIури, гьамсана, райондин гъуларилан чарх алдатури, табиаьтдин успагьи ва такабур йишварин шиклар йивури, дурар альбомдиз уч апIура, музеяриз вуйи алатар ва гъуларин чIурарин, кевшанарин ччвурар уч апIбан метлеб айи серенжемар тешкил апIури, дурар кIули гъахура. Му ляхнин асас мяна аргъаж шулайи насларихьна абйирилантина гъубзнайи фольклорин девлет ва хазна рубкьуб вуйи.
Мидихъди сабси, Зарема Шагьсинова 2004-пи йисхъанмина «Саб вуйи Урусат» партияйин ерли отделениейин вакил вуди гъахьну, 2006-пи йисхъанмина райондиъ думу партияйин руководителин вазифйир кIули гъахура.
Учв фуну гъуллугънаъ дерккишра, чан вазифйир баркаллувалиинди кIулиз адагъурайивализ лигну, Зарема Шахсинова райондин администрацияйин, республикайин жигьиларин политикайин, культурайин министерствйирин терефнаан йицIбариинди чухсагъул мялум апIбан ва гьюрматнан кагъзариинди лишанлу дапIна. Мидланра савайи, Мягьячгъалайиъ «Саб вуйи Урусат» партияйин къад йис къаршуламиш апIурайиган, хьур кас арсран медаларин ва пулин конвертарин сагьибар гъахьнийи, дурарин арайиъ Зарема Шагьсиновара айи. Миди сабсан ражну дугъу ляхин-карнаъ баркаллу зегьмет зигурайиваликан ва ужудар натижйир гъазанмиш апIурайиваликан шагьидвал апIура.
