Мейлан Нежефов

Ихь уьлкейиъ гьар йисан 8-пи июль Хизандин, мюгьюббатдин ва вафалувалин йигъ вуди къайд апIура. Арайиъ мюгьюббатвал ади хизан ккебгъувал фунур касдинра аьхю мурад-метлеб ву. Хъа гьадму мюгьюббат вафалувалиинди аьхиратдин хулаз гъяйизкьан уьбхюб гьарурин буржарикан саб ву.

 

Му машквран манишнан ялав аргъаж шулайи насларихьна рубкьури, улихьна йигъари Хив райондин А.Жяфаровдин ччвурнахъ хъайи кьялан библиотекайиъ «Вафалу хизан варибдин кIул ву» ччвур тувнайи «гергми стол» кIули гъубшнийи.
Библиотекайин вакил Тамила Байрамовайи му серенжемдин гьякьнаан чан фикрар ачухъ апIура: «Машквран тарих думукьан аьхюб дар, думу тазади къаршуламиш апIуз хъюгъю машкврарикан саб ву.

Вушра, дадайи гъубжу таза уьли хилар фици аргуруш, гьаци юкIв абгру ва кIваз хуш шлу машквар ву. Машквран тарихдикан ва дидин метелебарикан маракьлуди ктибту райондин Дишагьлийирин советдин ва райондин кьялан библиотекайин кIулиъ айи Зумрия Сяидягьмедовайиз, библиотекайин урхбан залин заведующий Раида Аьликберовайиз ва методист Наташа Гьяжимурадовайиз аферин пуз ккундузуз. Дурари чпин улхбариъ хизан гьарсаб ккебгъру ляхниъ шибритI, кьувват ва хътабгъурайи гьава вуйибдикан, юкIв кабсру, вафалу ва кIваз мани инсандихъди ккебгъру макан вуйибдикан ктибтнийи.

Дугъриданра, фикир гъапIган, хизан дарди, мюгьюббатну улар дараргу ва думу фу вуш гьисс апIуз дархьи кас дюн’яйихъ зат хътриршу мисал ву. Пеълихъан хътубгу шюхъси, аьжайиб ва назук шейъ ву инсан. Дугъаз фициб вушра чан кIваъ айи жини сир пай апIру кас лазим шулу. Хъа думу кас, гьелбетда, чпи кьюб юкIву апIрубна сар-сариз кIуруб гъайри касарихьан уьбхбаз вафалу вуйир духьну ккунду.
Гъит Первердигари гьарсар касдиз ужуб хизан ккебгъуз амур апIри ва думу хизан уьбхюз кюмекра туври!».