Зубайдат Шябанова

Гьаму йигъари СтIал Сулейман райондиъ, Хизандин йисаз тялукь вуди, Дагъустандин кьибла терефнан региондин этапдин «Гьавай, шубар» конкурс гъабхьну.

 

Конкурсдиъ Кьибла Дагъустандин 12 райондин командйир иштирак гъахьнийи.Табасаран райондиан конкурсдиз Кюрягъ гъулан мектебдиъ урхурайи шубар гъушну, ва дурари приздин йишв гъадабгъну.

Думу командайин кIулиъ айи Кюрягъ гъулан мектебдин директорин заместитель Айханум Рашидовайи къайд гъапIганси, конкурсдиз гъя-гъяйиз, дурарин гьязур шули хайлин йигъар гъахьну.

«Гьаму жюрейин серенжемариъ шубар аьхю аьшкьниинди иштирак шула. Райондиъра, республикайиъра ич мектебдиъ урхурайи шубарин дестейин хъуркьувалар рякъюри, «Гьавай, шубар» конкурсдиъра иштирак хьуз учуз теклиф гъапIнийи. Тамашачйирин ва жюрийин улихьна фуну ялхъван хьади удучIвуруш, ухдитIан йикьрар дапIнайча. Гьаддиз гьязур хьуз вахтра бегьем айи. Марьям Къазиевайин мяълийихъди апIурайи «Табасаран халачачйирин ялхъван» вари жюрийиз ва лигурайидариз кьабул гъабхьну», – гъапнийи ич сюгьбатнаъ Айханум Рашидовайи.

Конкурсдин метлеб аргъаж шулайи насли Дагъу-стандин аьдатарикан аьгъювалар гъадагъуб, дурар уьрхюб ва тарагъуб вуйи. Командйири шубуб номинацияйиъ талитар гъухну: «Ялхъвнарин устадвал», «Этномода» ва «Багъри ватандин тарих».

Конкурсдин натижйириинди сабпи йишв Мягья-рамкент райондин командайи гъадабгъну. Кьюбпи йишван сагьибар СтIал-Сулейман райондин команда гъабхьну. Хъа Табасаран ва Рутул районарин командйири чпин арайиъ шубубпи йишв пай гъапIну.

Гъалибчйириз ва пешкешнан йишвариз лайикь гъахьидариз думу серенжемдин тешкилатчи, меценат Нариман Гъазалиевдин терефнаан пулин пешкешар ва дипломар тувну.