Мейлан Нежефов

Табасаран халкьдин уьмрин тарихчи,
Миллет сатIи апIурайи чархачи,
Гафар’инди дибикIнайи халачи –
Багъри газат «Табасарандин нурар».

Му гафар «Табасарандин нурар» газатдин гимндиан ву. Думу гимн газатдин 90 йисандин юбилейихьна табасаран халкьдин композитор Кьасум Мягьямадовдин мукьмиз кючюрмиш шулайи деврин табасаран литературайин бажаранлу вакил, шаир Эльмира Аьшурбеговайи гъибикIуб ву. Дугъриданра, саки саб аьсрин арайиъ газатди багъри халкьдин уьмрин тарих чан машариъ атIабгура, ватанагьлийир сатIи апIура, ихь хулариз гьар жюрейин хабрар хура.

Магьа 2024-пи йисандин кьюбпи гьацIаз подписка апIру вахт дуфна. «Табасарандин нурар» – гьарсаб хизандиз!» – илтIикIура табасаранарихьна халачачи Марьят Насурова (шиклиъ).

«Гьар гьяфтайи газатдин таза нумрайиз, хулаз гъюрайи хялижвувазси, ккилигури шулза. Гъи саб яш дубхьнайи узуз Хив ва Табасаран районариъ, Дербент, Дагъустандин Огни, Мягьячгъала шагьрариъ, гьацира, сабхилди ихь уьлкейиъ шулайи шадвалинра, пашманвалинра хабрар-этерар газатдин машариан мялум шулазуз. Аферин газатдин гъуллугъчйириз — варибдин гъайгъушнаъ маракьлу мялуматар туврайивализ. Кьюрдну Мягьячгъалайиъ йиз баярихь шулза. Имбу вахтна – гъулаъ абйирин ругариин. Гъулаз тятIилариз узухьна худлар, гудлар гъафиган, багъри газат дураризра урхури шулза. Газатдиан узу кьюжли гьярфар айи гафар урхруган, дурар узухъ гьевеслуди хъпехъуру ва, чпизра урхуз иштагьвал гъюри, аьшкьламиш шулу.

Гъи багъри бабан чIалниинди вуйи урхуб-бикIуб кьит шулайиган, дидиз кюмек тувбан бадали, закурин насларихьна чIалнан ирс рубкьбан бадали, чIиви ляхин гъабхури ккунду. Магьа гьаму йигъари газатдин подписка давам гъапIунза. Учвура йисандин кьюбпи гьацIаз подписка апIуз кIваълан магьарханай, гьюрматлу ярар-дустар!» – хаиш апIура Марьят Насуровайи.