Умгьанат Сулейманова

Гьаму шиклик учвуз рякъюрайир Дагъ. Огни шагьрин 5-пи мектебдиъ 11-пи классдиъ урхурайи, спортдиин машгъул духьнайи Алиханов Гьямза Максимович ву.
Гъубшу гьяфтайиъ Санкт-Петербург шагьриъ джиу-джитсуйиан ва грэпплингдиан Варидюн’яйин чемпионат кIули гъубшну. Талитариъ спортдиин машгъул духьнайи ихь жигьил ватанагьли Гьямза Алиханов, шубубпи йишв дибисну, кемшрин медализ ва пешкешназ лайикьлу гъахьну.

Гьеле мектебдиъ имиди, Гьямзайин спортдихьна вуйи янашмиш’вал рябкъюри, гележегдиъ дугъу ухьу бегьем рази апIиди кIури хиял вуйиз. Аьхиримжи йисари дугъу Урусатдин, Дагъустандин чемпионатариъ, талитариъ саб-швнуб ражари пешкешнан йишвар гъазанмиш гъапIну. 2021-пи йисан Краснодар шагьриъ кьибла Урусатдин чемпионатдиъ АСВJJ-йин жюрйириан ва грепплингдиан кьюб сапби йишвар гъадагъну. Ва гьадму йисан Гьямза Москва шагьриъ Варихалкьарин арайиъ вуйи талитариъра 1-пи йишан сагьиб гъахьну. Дугъу гележегдиъ спортдин рякъюъди гъягъюз чан аьшкь айивал улупна.

Гьелбетда, Гьямзайин спортдин хъуркьувалик дугъан абйир-бабарин ва тренер Мурад Аьбдуллаевдин аьхю пай ка. Спортдин рякъюъ увуз заан хъуркьувалар ккун апIурача, Гьямза.