Мейлан Нежефов
27-пи сентябри Дербент шагьриъ табасаран чIалниинди бикIрударин «Гьевес» кIуру ччвур тувнайи клубдин нубатнан серенжем кIули гъубшну. Гьарганси, му ражарира уч духьнайи шаирари чпи гъидикIу цIийи шиърар гъурхну.
Дупну ккундуки, яратмиш апIбахьна маракьлувал айи инсанариз мицдар гюрюшар хътабгъру марцци гьаваси герек ву.
«Гъийин йигъанстар мяракйир ухьу вахт-вахтарик текрар апIури, сар-сарихъ хъпехъури, гъидикIу цIарариз кьимат туврували ухьуз апIурайи ляхин давам апIуз, гъалатIариин лихуз ва дурар дюз алауз кьувват тувра, юкIвар шад апIура. Гъи ухьу саб кьадар ляхин кIули гъубхунхьа», – натижа гъивнийи «Гагь’ин цIадлар» кIуру китабдин автор Къизейбат Гьяжиибрагьимовайи.
«Дербентдин литературайин клубдин табасаран писателарин десте гизаф албагуб ву. Белгород областдиан мина ихь шаир, мялим ва жямяаьтлугъ кас Шюшеханум Керимова гъювалира му дестейин активвализ хъанара зурба кьувват тувну, гюрюшар, эсерар арайиз адагъувал ва дурар чап апIувал артухъ гъахьну», – къайд гъапIнийи му клуб тешкил гъапIу шаир, драматург, таржумачи Эльмира Аьшурбеговайи.
Му йигъандин мяракайиз кьимат клубдин иштиракчйиризра тувнийи.
Инаят Римиханова: «Му гюрюш узуз лап кьабул гъабхьунзуз, жвуву гъибикIу шиърихъ хъпехърур айиган, дидиз кьимат тувруган, бикIузра юкIв шулу. Ухьу ухдитIан сар-сариз майил-мадатси вухьа, мицдар гюрюшарин кьяляхъ цIийи шиърар арайиз гъюру. Аферин учвуз, дустар».
Дельфуруз Ханялиева: «Мицдар гюрюшари ухьук гьевес капIрайиганси, лазим дару хабрар-этерари ккабгънайи юкIв саб бицIи вахтназ вушра илцифуру. Швнуб-саб фикир, хиял кIул’ан утIуккну, гъеерхьу цIарар давам апIуз ккун гъабхьнийиз, ихь багъри чIалниинди гафар апIури, шиърар урхури гьапIу вахт давди гъябгъидар, цIийи эсерар арайиз гъиди».
«Сар-сариз гъяркъган, ихь юкIварик гьевес кубчIру гъидикIу шиърар гъурхган, рягьят шулу, гьаддиз кми-кмиди мицдар мяракйир кIули гъахуз чалишмиш хьидихьа», – гъапну му серенжемдин аьхириъ бицIидариз вуйи «ЦIадлар» китабдин автор Минара Гьяжиевайира.
Багъри чIал уьбхбак лайикьлу пай киврайи ихь шаирариз гьевес, кьувват, ужувлар ишри!
