Умгьанат Сулейманова
Аьхиримжи вахтари аргъаж шулайи наслиз багъри чIалнахьна ва литературайихьна ккунивалин гъяд иливурайидар бабан чIалнан мялимар ву гъапишра, кучIлар даршул. Амма, гьяйифки, гъи бицIидарин багъариъ вари дарсар урус чIал’инди гъахура, хъа мектебариъ бабан чIалназ ва литературайиз улупнайи сяътар лап цIидар ву.
Бабан чIалнахьна бицIидарин ва аьхюдарин аьшкь артухъ апIбаъ ихь шаирарин рольра аьхюб ву. Дурарин эсерарихъди бицIидар ккергъбан классарианмина таниш дапIну ккунду.
Ихь шаирариканра гизафдари гъи чпин гьевеснан цIюмгълар бицIидариз бахш апIуз хъюгъну а –аьхиримжи йисари чапдиан адагъурайи гизаф китабариъ бицIидариз ва живанариз вуйи паяр ади рякъюру. Гьамдихъди сабси, табасаран литература, кIулди гъадабгъиш, гьамусяаьт жанлуди артмиш шула – мидин гьякьнаан литературайин зиин лихурайи аьлимарира, Дагъустандин писателарин союздин гъуллугъчйирира, жара халкьарин литературайин вакиларира кIура. Ихь литература улихьна гъябгъюрайивалин себебарикан саб тажрубалу, машгьур авторари цIийиди поэзияйиз гъюрайидариз гьаржюрейин кюмек туврайивал ву. Таза шаирариз гьациб кюмекнан хил гьачIабккури, хайлин йисари ляхин апIура Дербент шагьриъ айи табасаран литературайи «Гьевес» ччвур тувнайи клубдира.
Дупну ккундуки, бинайиан «Гьевес» клуб тешкил гъапIур табасаран шаир Эльмира Аьшурбегова ву, кьяляхънаси дугъахъди сатIиди му ляхин гъабхуз шаир Шюшеханум Керимовара хъюгъну. Клубдиз уч шулайи дишагьлийир гизафси жигьил вахтари яратмиш апIуз мумкинвал дархьидар ву. Гъи дурари чпин эсерар, кьанди вушра, урхрударин улихьна адагъура. Дурариз кюмек вуди Эльмира Аьшурбеговайи ва Шюшеханум Керимовайи йисан кьюб-шубуб ражари шиърар дикIрудариз яратмиш’валин гюрюшмишар тешкил апIуру. Дурар гъахру вахтна уч духьнайидари ихь дагълу чIалар айи гьялнакан, багъри чIалназ фикир тувну ккуниваликан кIури шулу, чпин цIийи шиърар урхуру.
30-пи ноябри, «Гьевес» клубдин нубатнан заседание кIули гъубшну.
Мушваъ Рягьимат ТIагьировайи, Дельфуруз Ханялиевайи, Къизайбат Гьяжи-ибрагьимовайи чпин эсерар гъурхнийи. Эльмира Аьшурбеговайи ва Шюшеханум Керимовайи Бабан йигъаз бахш дапIнайи чпин шиърарихъди гъарашугъар таниш гъапIнийи.
