Мейлан Нежефов
«Адашдинси, дадайинна терефнаан вуйи багахьлуйир гизафдар спортдиин илчIихнайивали узукра паплар кивну», – гьамци ккебгънийи узухъди вуйи сюгьбат макьалайин игит Жасмина Исмяиловайи.
Жасмина 2009-пи йисан 9-пи октябриъ Мягьячгъалайиъ бабкан гъахьну. Хъа бина Хив райондин Асккан Яракк гъул’ан ву. Шуру сабпи гамар алдагъуз хъюгъюбси, адаш Казбекдиз ва дада Марифатдиз дугъан зирекваликан мялум гъабхьнийи. Гьаци, шуран ургуд йис тамам гъабхьиган, абйир-бабари думу художественный гимнастикайиз гьаъбан къарар адабгънийи. Сабпи йигъариланмина шуран бажаранвал артмиш апIбиин тренерар Марина Игнатьева, Мария Стародубцева ва хореограф Патимат Къурбанова машгъул гъахьнийи. Фицики, жарадарси дарди, Жасминайи чаз улупурайиб ва кIурайиб магнитиси бисуйи.
Мидин жини сир фтиъ аш, Жасминайи кьатI’иди ва мяналуди ктибтнийи. «Адашдин терефнаан Кюругъли аба Ярккарин кьялан уьмуми мектебдиъ физкультурайин дарсар киврайи мялимди лихури, магьа имид-амдар 50 йис ву. Хъа дугъан баярин (йиз эмарин), Исмяилин, Ракимдин ва Даниялин, Урусатдин Яракьлу кьувватарихъди контракт йибтIну, гъуллугъ тамам апIури, шлин къад йис, шлин хъана артухъ ву. Дурар Сирияйиъ, Къарабахдиъ яракьлу гьяракатарин, хъа гъи Украинайиъ гъабхурайи хусуси метлеб айи дявдин операцияйин иштиракчйир ву. Дадайин гъардаш йиз халу Заур Къурбановра контрактдиинди жюрбежюр гъуллугъарихь лихура. Йиз спортдихьна вуйи ккунивалин ва сагъламвалин гъаразнаъ ади узу гъабхурайи ляхниз гиришрар ккивдар кюлфетдин аьхю кIулар ву», – гъавриъ тIаънийи Жасминайи узу.
Республикайиъ спортдиан гъахурайи талитариъ гъазанмиш апIурайи хъуркьувалариз лигну, Жасминайиз 2024-пи йисан «Йисандин спортсмен» ччвур тувнийи. Хъа гьаму улихьна йигъари художественный гимнастикайиан дугъу «Урусатдин спортдин устад» ччвурра гъазанмиш гъапIну.
Мягьячгъалайиъ 34-пи мектебдин 9-пи классдиъ урхурайи Жасминайи, спортдиъси, урхбаъра заан аьгъювалар улупура. Зигьимлу шуран шикил мектебдин гьюрматнан кьулик кебхна. Аллагьдин амриан дугъу гьаму йигъари 9-пи класс уьру аттестатдиз ва медализ ккудубкIиди.
Чаз мектебдихьан ва тренировкйирихьан азад вахт гъабхьибси, Жасминайи бицIи классариъ урхурайидариз чахьан шлу спортдин дарсарра тувра. Мектебдиъси, республикайиъра кIули гъахурайи ватанпервервалин серенжемар сабра ихь шуран иштираквал адарди кIули гъюгъюрадар. Инанмиш вуза, яв ччвур учуз хъана швнубсабан ебхьиди, Жасмина.
Жасминайихъ варибдиз далу вуйи гъардаш Артурра хъа. Думу гьеле мектебдиъ урхури имиди спортдиин илчIихур вуйи. Цци Артурра ДГУ-йин физический факультет уьру дипломдиинди ккудубкIбахьна гъюра. Жигьил Исмяиловарин хъуркьуваларин рякъяр ихь халкьдиз мянфяаьт кайидар ишри.
