Мейлан Нежефов
Ухьуз мялум вуйиганси, гьар йисан ноябрин аьхиримжи элгьет йигъ Дадйирин йигъ вуди къайд дапIна. Хъа му машквран йигъ гьарсар касдин кIваз фици хуш вуш ва дидхьан фициб манишнан ялав гъюри аш, «Дада» кIуру гьаму саб гафнан мянайи субут апIура.
Хив райондин глава Ярмет Ярметовдин къарарниинди саки вари гъуларин администрацйириъ, мектебариъ ва бицIидарин багъариъ му йигъаз тялукь вуйи серенжемар кIули гъахура. Гъийин йиз макьалайиъ жвувра иштирак гъахьи Мажвгларин кьялан мектебдиъ кIули гъубху серенжемдикан ктибтуз ккундузуз.
Мектебдин администрацияйин теклифниинди сумчIурилан зиина дадйир дуфнайи. Дурарин арайиъ къайихьурихьнакьан Украинайин сяргьятариин хусуси метлеб айи операцияйиъ иштирак шулайи игитарин дадйир ва бабар айи. Теклиф кьабул дапIну дуфнайи дадйириз чухсагъул мялум апIури, мектебдин директор Анвер Хидировди, дурар улубкьурайи машквран йигъахъди мубарак гъапIнийи.
«Гьюрматлу дадйир! Марцци кIваан учвуз улубкьурайи машквар тебрик апIураза. Учвуз жандин мюгькам сагъ’вал, хизандиъ хушбахтвал, бейгъуш хьуз лайикь вуйи Украинайин миллетчйирихъди женгнаъ айи ихь кьягьял баяр, гъалибвал гъадабгъну, ихь багъри ругариина сагъ-саламатди хъадакну гъюб ккун апIураза. Йис аьхирихъна гъюри, ЦIийи йисахъди хайирлу хабрар, жил’ина аку йигъар ва ислягьвал кьисмат ибшри, жан аьзиз дадйир!» – гъапнийи дугъу чан улхбаъ.
Серенжем давам апIури, мектебдиъ урхурайидари бабан ва урус чIалариинди дадйириз бахш дапIнайи шиърар кIваъланди гъурхнийи. Райондин администрацияйин терефнаан дадйириз мублагъвалин ва кIваз мани гафар «Хив» телевидениейин мухбир Инаят Рамазановнайи гъурукьнийи.
«Гирами бабар! Учвуз райондин администрацияйин ва йиз терефнаан улубкьурайи варитIан кIваз хуш вуйи ихь йигъ мубарак апIураза. Гъит ухьлантина вуйи марцци гьякаларстар ихь веледари ухьу гьарган аьлхъюри, юкIв шадди дерккри. Жараб кIурдарза, гъит, «Дада» кIуру ччвур тувнайи касдиз гьарсаб йигъ машквар ибшри!»
Мани чай убхъури, чпиз айи дерд гьял апIурайи бабариз Табасаран райондин культурайин хулан гъарашугъ, РД-йин культурайин лайикьлу гъуллугъчи Арсен Аслановди чюнгрихъди, чIиви сесниинди дадайиз ва багъри Ватандиз бахш дапIнайи мяълийир гъапIнийи. КIваин апIуз ккундузуз, дугъан чан сар веледна кьюр чвйир гъи гьадму хусуси метлеб айи операцияйиъ иштирак шула. Мидланра савайи, Арсен кьюб ражари гуманитарный гъагъ ва концертдин программа хьади ихь баярихьна Украинайиз душна.
Мяълийирихъди дугъу дагълуйин убцру ифи жандиъ убхьурайи ихь кьягьялари улупурайи гьунарариканра ктибтнийи.
Серенжемдиъ айи саб пай игит бабарин кью-кьюдарди баяр гъи операцияйиъ иштирак шула. Дурарин ччвурар ктудухди гъузуз хьибдарзухьан: Къяйсият Байранбегова, Бики Мирзаагъаева, Наида Ибрагьимова, Зар’ят Мягьярамова.
Cеренжемдин аьхириъ узу «Игит баб» ччвур тувнайи Шеристан Жалиловайихъди сюгьбат гъубхнийза.
«Узу бахтавар кас вуза. Аллагьдикан узуз йицIишубур сагъу велед тувнайивалиин узу гизаф рази вуза. Варидариз зигьим ва тербия тувну, дурар ликриин гъапIунза, ва гъи гьарур чан хуланйишван эйси ву. Кьюр байна швушв гъулаъ айиз, хъа имбудар – гьубкьу йишваъ сар. Гьар йигъан зенг йивури, гьерхуб-хъерхуб апIури, йиз гъайгъушнаъ шулу. Аферин чпиз. СумчIурилан зиина худлар ва йицIишубур гудул азуз. Хтул Миленайин жилир Кемран Гьяжимягьямедов Украинайиъ талаф гъахьнийиз. Шюкюр ибшричаз, Худайиз, дарш сарун сариканра дердхажалат ва учIврушин гъябкъюндарзуз ва гъеебхьундарзуз. Гъит хъана кьисмат дарибшри, я Рабби. Дициб хабар кубкIайиз, узу дукIну ккундузуз. Сар абайиз-бабазра балин дерд кьисмат дарибшри.
Гьамшвахь чпин баяр талаф гъахьи Бики, Мая ва Наизат рякъюри, юкIв тIубкIурайиз. Йизра язнйирикан ва худларикан гъи гьатушваъ а. Гъит дюн’яйиъ ислягьвал ибшри, кIул’ин алтIабгнайи укIу зав ва ихь гележег акуб ибшри», – гъапнийи Шеристан бабу.
