Мейлан Нежефов
Ухьуз мялум вуйиганси, сач Урусатдин вари мектебариъ гьар гьяфтайин итни йигъандин дарсар «Эгьемиятлубдикан сюгьбат» кIуру ччвур тувнайи проектдин дарсналан ккергъри гъахьнийи. Му проект ццира кьувватнаъ ами.
Гъябгъюрайи гьяфтайиъ му дарс, «Наан Урусат аш, душваъ – ватандихьна вуйи ккунивал» кIул тувну, Хив райондин варитIан аьхю, Хиварин гъулан Манаф Шамхаловдин ччвурнахъ хъайи кьялан мектебдиъ гъабхьну. Му йигъан «Эгьемиятлубдикан сюгьбат» дарс райондин глава Ярмет Ярметов кIули гъубхнийи.
Сифте вуди мектебдин гьяятдиъ гъабхьи линейкайиъ Урусатдин ва Дагъустандин гьюкуматдин пайдгъар за гъапIнийи ва гимнарихъ хъпехънийи. Хъасин райондин кIулиъ айири 11-пи классдиъ урхурайидариз вуйи дарс мектебдин айитI давам гъапIнийи.
Дарс ккебгъри, Ярмет Ярметовди ватандихьна вуйи ккунивал, гьюрматлувал, багъри бабахьнаси, заан дережайиъди дибисну ккуниваликан гъапнийи, хъасин дарснан асас тема – ватанпервервал – аьян гъапIнийи.
Узу мектебдиъ директорин тербияйин ляхнариз лигру заместителди лихурайи Рауф Аьгьмедовдихьан, учв райондин главайин дарс кIули гъабхбаз фици лигураш, дугъу баяр-шубариз фицдар гафар-чIалар гъапIнуш, гьерхнийза.
«Саб башкъа ву классдиъ урхурайидариз важиблу вуйибдикан ктибтури, сайтнаъ айи видеоматериаларна презентация улупуб. Хъа урхурайидарихъди гьамци чIиви ляхин гъабхуб жара башкъа ву. Дугъриданра, узуз кюмек вуди гъи райондин кIулиъ айири дарснаъ гъубху чIиви ляхниин рази вуза. (Глава ву кIури ваъ, хъа дугъриданра чIиви ляхин гъабхбиин). Асас вуди дугъу чан улхбаъ, абйирилан мина ухьухьна дурубкьнайи хазна – адлу эскервалин ирс – гъи ихь райондиан бин вуйи варжар’инди кьягьялари фици уьбхюраш, ктибтнийи.
Ярмет Алиметовичди гъапиганси, инсан жил’ина халкь гъапIхъантина ккудушу аьсрариъ гъахьи дявйириъ ихь абйир-бабари фициб жафа гъизигнуш, ухьуз тарихнаан мялум вухьуз. Хъа гъи ихь жавабдарвалин ва ватанпервервалин вахт улубкьиган, ухьу кьяляхъ зигухьахъа? УргцIурилан зина йисарилан думу дарсарин тарих эзбер шул дупну, шлин фикир вуйихъа? Гьич саринра! Магьа гъи думу йигъар дуфну, кьюд кIуру йисра ктабхъура. Гъи райондин администрацияйи, агьалйири ва чпин бин райондиан вуйи меценантари Урусатдин яракьлу кьувватарин эскрариз хътапIурайи рягьимлувалин кюмекнакан, мобилизацияйин шилнаъди дявдин цIин майдандиъ айидарин хизанариз гьар жюрейин кюмек туврайиваликан, уьмриан гъушу кьягьяларин гьюрмат уьбхюри, дурарин суратар кади гьязур дапIнайи мармардашдин гъванар чпи яшамиш шули гъахьи кючйирин хуларик, мектебдин цаларик керхрайиваликан ва райондин гъуларизди учIвру гурариин дивнайи стендарикан, райондин агьалйири Украинайиъ улупурайи дирбаш’валикан, дурарин дявдин наградйирикан ктибтнийи.
Урхурайидарира, гьерхуб-хъерхуб апIури, кьягьяларин уьмрикан цIийи аьгъювалар гъадагъури, гьаз флану касдин ччвурнахъ кюче, мектеб, ядигар хъаш, главайихьди чпи гъаврикк ккауз гъитри, цIийи аьгъювалар гъадагънийи. Мидланра савайи, Ярмет Ярметовди, улубкьнайи цIийи урхбан йис тебрик апIури, гьарсар выпускникдиз, чпи урхбан йисан аьхириъ тувру имтигьнар фикриъ дидисну, чпин улихь дивнайи метлебар кIулиз адагъуз ужудар сяътар ккун гъапIнийи», – ктибтнийи Рауф Аьгьмедовди.
