14-пи декабриъ Мягьяч-гъалайиъ ерлешмиш дубхьнайи Къумукъ театриъ махлукьатлу мялуматарин вакиларихъди вуйи серенжем кIули гъубшну. Думу мярака Расул Гьямзатов бабкан духьну 100 йиз тамам хьпаз бахш дапIнайи серенжемарин дахилнаъди, СМИ-йин вакиларин арайиъ кIули гъубшу «Расул Гьямзатов – Ватан кIваъ ади аьсрар» конкурс аьхирихъна гъюбаз бахш дапIнайиб вуйи.

Му серенжемдиъ Дагъустан Республикайин Главайин къарарниинди цIиб улихь вахтна «Табасарандин нурар» газатдин жавабдар секретарди лихури гъахьи Мегьти Аьдилов ва газатдин политикайин отделин редактор Гюльнара Мягьямедова, ляхниъ ужудар хъуркьувалар улупбаз ва улихь диврайи суалар ужуб ери ади тамам апIбаз лигну, республикайин Главайин терефнаан вуйи Баркаллувалин кагъзариинди лишанлу гъапIну.