Зубайдат Шябанова

Урусатдиъ цци февраль вазли хусуси метлеб айи операцияйиъ кечмиш гъахьи эскрарин хизанариз ва СВО-йин ветеранариз «Ватан уьбхюрайидар» фондди «горячая линия» ачмиш гъапIну. ЦУР-иан мялумат тувганси, телефондин 117 нумрайиз зенг дапIну, жвуван метлеб, тIалаб пуз шулу. Думу телефондиан СВО-йиъ гъахьи зийнариан госпиталариъ вая хулаз гъюбан кьяляхъ кечмиш гъахьи эскрарин багахьлуйирихьанра илтIикIуз шулу.

«Горячая линияйиз» саб суткайин арайиъ кьялан гьисабариинди 700-900 зенг гъюра. Хъа гъийин йигъаз зенгар гъапIдарин уьмуми кьадар 110 агъзур ву. Телефондин гъуллугънаъ айидари чпиз гъафи зенг саки 30 секунддин арайиъ кьабул апIура. СВО-йиъ гъийиху эскрарин хизанари чпин илтIикIбариъ асас вуди «горячая линияйин» вакиларикан чпин багахьлуйир агбаъ, контракт йибтIбаъ, шартIлу гьякъи тувбаъ (выплатйир), льготар, ветеранарин удостоверение гъадабгъбаъ консультация ккун апIура.

Мидланра гъайри, «Ватан уьбхюрайидар» фондназ улихьнаси гьамусра, кюмек ккун апIури, илтIикIуз шулу. Думу Мягьячгъала шагьриъ Абубакаровдин ччвурнахъ хъайи кючейин 117-пи хулариъ ерлешмиш дубхьна. Гьацира +7 (8722) 51-04-11 телефондин нумрайиз зенг апIуз шулу.