Гюльнара Мягьямедова
14-пи декабри Дагъустан Республикайин Главайин грант бадали мялум дапIнайи конкурсдин натижйир гъивну. Образованиейин, илимдин, техникайин, экономикайин, культурайин ва хъана жара цирклариъ 70-риинакьан проектар уьмриз кечирмиш апIуз физический ва юридический касариз кюмек тувди.
Образованиейин, илимдин, техникайин ва инновацияйин цирклиъ гъалиб гъахьидарин арайиъ Табасаран райондин кьюр агьали а: филологияйин илмарин кандидат Низами Сафарялиев ва филологияйин илмарин доктор Мягьяммед Къурбанов. Дурарин проект «Табасаранарин фольклоринна литературайин эсерариинди мектебариъ урхурайидариз рюгьнанна эдеблувалин тербия тувуб» – «Классдин гъирагъдиъ урхру фольклоринна литературайин эсерарин гъварч» РД-йин Главайин грантдиз лайикь гъабхьну.
Грант гъадабгъувалихъди тебрик апIури, узу филологияйин илмарин доктор Мягьямед Курбановдихьна, проектдин метлебарикан ктибтувал ккун апIури, илтIикIунза. Дугъу гьамциб жаваб тувнийи: «Аьхиримжи йисари ихь республикайин мектебариъ милли чIаларин, литературайин дарсариз тувнайи сяътар цIиб апIурайивализ дилигну, бицIидари ихь милли рюгьнан ирснан ва шаирари бабан чIалниинди дидикIнайи эсерар урхувал лап цIиб дубхьна. Аьхиримжи 30-40 йисандин, китабарин ерина жюрбежюр гаджетар ишлетмиш апIури, ригъ алабхъру терефнан уьлкйирин культурайин тясирлуваликк ккахъну, ихь уьлкейин халкьдиз жвуван рюгьнан ирс гьархуз хъюбгъна. Гьаддиз гъи ухьу, жараганси дарди, ихь ата-бабйири аьсрариинди ухьуз гъитнайи аьдатарин бинайиинди, милли чIалар, литература, культура, аьдатар уьрхбан бадали вари мумкинвалар ишлетмиш дапIну ккунду. Проектдиъ мектебариъ урхурайи баяр-шубарин рюгьнанна эдеблувалин тербияйиз тясир апIру фольклорин ва литературайин эсерар ишлетмиш дапIна», – гъапнийи аьлимди.
Экономикайин цирклиъ Табасаран райондин сарсан вакил – профессор, Дагъустан Республикайин лайикьлу экономист Низами Аскеровдин «Муниципальный экономикайин барометр» проектра гъалиб гъабхьну.
Конкурсдин гъалибчйириз сертификатар тувбан серенжем гьаму йисандин аьхириъ кIули гъябгъиди, душваъ Сергей Меликовра иштирак шиди.
«Табасаран нурар» газатдин редакцияйин коллективди грант гъадабгъу ихь ватанагьлийир кIваантIан тебрик апIури, дурариз илимдин рякъюъ хъана заан хъуркьувалар ккун апIура.
