Наргиз Гюлечова

Июлин 6-диан 13-дизкьан Московский областдин Люберцы шагьриъ грепплинг-ги спортдин жюрейиан 18-19 йисарин яшариъ айи жигьиларин арайиъ Урусатдин первенство кIули гъубшну. Думу талитариъ Дагъустандианра хайлин спортсменар иштирак гъахьнийи. Гьадрарин арайиъ Хиван вуйи Дагъустандин исламдин университетдин 5-пи курснаъ урхурайи студент Мюгьяммад Мирзахановра айи.

 

Ихь ватанагьли 58 кило гъагъ айи спортсменарихъди талитариз талитариз удучIвну. Чав кIули гъуху вари кчIихбари гъалиб духьну, дугъу грепплинг-гийиан «Урусатдин чемпион» ччвур гъазанмиш гъапIну.

«Узу бицIидихъанмина спортдиин юкIв алир вуйза. Мягьячгълайиз урхуз гъафихъан «UniversaI Fighters» спортзализ гъягъюри, тренер Мурад Нурудиновдин хиликкди му спортдиин машгъул гъахьуаза. Грепплинг ва грепплинг-ги спортдин жюрйириан гъийин йигъаз кьюб ражари республикайин ва кьюб ражари СКФО-йин чемпионра гъахьунзу. Хъа ккудубшу йисан грепплин-ги спортдиан Урусатдин чемпионатдиъ иштирак гъахьнийза, амма 3-пи йишвтIан гъадабгъуз гъабхьундарзухьан.

Хъа цци кIуруш, талитарихьна лап ужуди гьязур духьну чемпионатдиъ иштирак гъахьунза. Натижайиъ 1-пи йишван сагъибра гъахьунзу. Гьадму первенствойиъ грепплингдианра талитариз удучIвунза ва думу спортдин жюрейиан 3-пи йишв гъадабгъунза», – ктибтнийи узуз спортсменди.

Къайд дапIну ккундуки, грепплинг-ги спорт – кимоно алди, хъа грепплинг кIуруш кимоно алдарди талитназ удучIвурайи спортдин жюрйир ву. Жара башкъавалар дурарин арайиъ адар.