Мейлан Нежефов

Гьар фуну ляхниъра жямяаьтдин гаф ва мурад саб гъабхьиган, фу вушра саб хайирлуб арайиз хуз гъулайди шулу. Думу гьаци вуйибдин, гъийин йиз макьала гъурхиган, гъаври шалчва, дустар. Гьаму гьякь вуйиб улихьнаси Хив райондиъ гъабхьи гьядисйирра субут гъапIну.

Хиварин гъулаъ жямяаьтдин кьувватниинди гъул’ан гьаризди гъягъюз таза гъяд иливну. Хиварин жямяаьт му ляхнихъ 2022-пи йисхъанмина хъюгънайи. Магьан му уьмарат дивуз чпин кIул’ина гъадабгъу ляхин гъи ватанперверари аьхирихъна гъабхну.

Гъулан вафалу кас ва глава вуди му ляхниин кьадарсуз разиди айи Фахрудин Рамазановди чан фикрар ачухъ апIура: «ИкибаштIан, гъи гъулан глава узу вуш, закур жарар хьиди. Амма гъулаъ ччвур иливну гьарсаб объект тазади тикмиш апIбаъ вая, йирсиб цIийи алапIури, рас апIуз чарйир агбаъ жямяаьт улихь хьайивали гевюли кюкю адабшвурайиз. Гьарган кIурайиб вуйиз: юкIв гъабхьну кIури, гьарсаб ляхин-карнаъ жямяаьт бакар дархьикьан гагьди, сар главайихьан фукIа апIуз шлуб дар. Магьа тазади дивнайи гъяду думу гьаци вуйивал тасдикьра апIура. Гьюкуматдин терефнаан жизбикьан кюмек адарди, гьаму аьхю ляхин жямяаьтди кIулиз адабгъну – 63 метр ярхишин, имид амдар 2 метрихьна яркьушин ва 74 метр ягълишин ади «Хванан мюгь’ан» гъяд тикмиш гъапIну. Гъулан агьалйир ва гъирагъдилан сейриз гъафи хялар гъядралан улдучIвиган, «Хвана гьариъ» айи ужудар гъаргъу булагъарихъна, хифариккна, аьмлюхъяриккна, гъяни жихрариккна адахъура. Мидланра савайи, му гъяду Хиварин гъулан дагълариз ва сивариз адаура. Сабсан ражну аферин гафниинди, пулиинди ва ляхниинди кюмек гъапIу ватанперверариз. Гъулаъ гъабхьи уьмарат анжагъ шадвализ бакар ибшри», – къайд гъапIнийи Фахрудин Рамазановди.