Мейлан Нежефов

Ихь шаир Эльмира Аьшурбеговайи Италияйиъ гьар йисан кIули гъябгъюри шлу Варихалкьарин поэзияйин «Парнас – премия Анджело ла Веккья» ччвур али конкурсдиъ сабпи йишв гъибисну.

Тешкилатчйири му конкурсдиз дюн’яйин фуну миллетдин чIалниинди вушра дибикIнайи эсер хътапIуз мумкинвал тувнайи. Анжагъ оригиналин чIалниинди вуйи шиърихъди урус, инглис вая итальян чIалариина илтIибкIнайи текстра хъади хьувал тIалаб апIурайи. Эльмира Аьшурбеговайи конкурсдиз, урус чIалназра илтIибкIну, чан «Хьайин аьшкь» кIуру шиир хътапIну.

Гъалибчйирин шиърар итальян чIалниинди удубчIвру «Парнасдин гъийин деврин шаирарин эсерар» антологияйиъ чап апIиди.
Ихь писателиз Калининград областдианра литературайин сабсана хъуркьувал субут апIурайи диплом дуфна. Эльмира Аьшурбегова Всеволод Остендин ччвурнахъ хъайи литературайин заочный конкурсдин «Жикъи проза ва публицистика» номинация-йиан дипломант кIуру гьюрматнан ччвурназ лайикь гъахьну.
Гизаф разивалалиинди газатдин терефнаан му хъуркьувалар мубарак апIури, ихь шаириз хъана аьхю гъалибваларин сагьиб хьуб ккун апIурача!
Шаирин тазади духьнайи хъуркьуваларикан гъюру нумрайиъ яркьуди дибикIну тувдича.