Наргиз Гюлечова

 

Дюгю

Дагъустандин гъулан мяшатдин нежбрар хутIлариъ дюгю убзбахьна гьязур шула.
Республикайин гъулан мяишатдин ва ипIру –убхъру сурстарин министерствойин пресс-гъуллугънаан тувнайи мялуматариинди, цци региондиъ 32 агъзуртIан артухъ гектариъ дюгю убзуди. ВаритIан гизаф дюгю гьясил апIурайи муниципалитет Къизлар район ву.
Къайд апIуб лазим вуки, ккудубшу йисан региондиъ цIийи рекорд дивну – 155 агъзуртIан артухъ тоннайин дюгю уч гъапIну, ва гьаддиинди дюгю гьясил апIбаан Дагъустан Урусатдиъ 2-пи йишв’ина удубчIвну.

 

Йимишар уьрхру йишвар

Дагъустандиъ йимишар гьясил апIурайи аьхю мяишатари чпин багълариан уч гъапIу 68,8 агъзур тоннайин бегьер уьбхру йишвар тикмиш апIуз планариъ улупна.
Мягьярамкент райондиъ ерлешмиш дубхьнайи «Багъ» КФХ-йи 10 агъзур тонна йимишар уьрхру йишван тикилишчивалин ляхнар ккергъна. Гьаци, Дербент райондин ругариин 8,8 агъзур тоннайин йимишар уьрхру йишв «Анжелина» ООО-йи ва 50 агъзур тоннайин йимишар уьрхру йишв айи дарамат СтIал Сулейман райондин ругариин «Полоса» ООО-йи тикмиш апIури хъюгъна.
«2023-пи йисан республикайин 1575 гектариъ йимишдин багълар итну. Гьаму кьадар 2022-пи йисантан 26,5% артухъ ву.
Республикайин багъманчивалин цирклиз гьюкуматдин терефнаан 406 миллион манатдин кюмекра дапIна», – мялум гъапIну республикайин гъулан мяишатдин министерствойиан.